Thaçi: Shqiptarëve u mbetet të akomodohen në një shtet

Prishtinë – Duke iu drejtuar sot ligjvënësve, në seancën plenare të rregullt rreth raportit të fundit të KE për liberalizimin e vizave, kryeministri i Kosovës sqaroi për pakënaqësinë që ka shfaqur ndaj Brukselit.

“Kjo nuk është e vetmja padrejtësi ndaj shqiptarëve. Ndaj shqiptarëve është bërë një shekull i tërë i padrejtësive”, tha kryeministri.

“Justifikimet e Brukselit janë të paqëndrueshme dhe të pajustifikueshme për procesin e liberalizimit të vizave për Kosovën. Ka kritere të reja, të cilat do t’i kryejmë në afat rekord”, tha theksuar Thaçi.

Duke folur për këtë proces, shefi i Qeverisë së Kosovës tha se “shqiptarëve nuk iu mbetet tjetër veçse të akomodohen si një shtet i vetëm”.

Në kuadër të pikës Deklarime të lira jashtë rendit të ditës, deputeti i AAK-së, Ardian Gjini u shfaq kritik ndaj dukurisë së braktisjes së mbledhjeve të Kuvendit, edhe pse në mbledhjen e fundit Aleanca për Ardhmërinë e Kosovës vetë e braktisi sallën, duke mos u pajtuar me propozimin e Qeverisë së Kosovës për anëtarët e Bordit të Bankës Qendrore. Siç u shprej ai, AAK-ja është zotuar se nuk do ta lëshojë më sallën e Kuvendit, cilido qoftë emër i propozuar nga Qeveria për çfarë do problemi. (koha)