Amerika gjithmonë me Kosovën

Presidenti amerikan Barack Obama, ka vlerësuar rrugën e Kosovës për normalizimin e marrëdhënieve me Serbinë. Në gjashtë vjetorin e Pavarësisë së Kosovës, ai ka thënë se edhe nisja e bisedimeve me BE-në për marrëveshjen e stabilizim-asociimit shënon edhe një të arritur të rëndësishme të Kosovës.

Letrën e presidentit Obama e ka e lexuar ambasadorja e SHBA-së në Kosovë, Tracy Ann Jacobson, në ceremoninë e parakalimit të Forcës së Sigurisë së Kosovës.

“Me këtë dialog udhëheqësit e Kosovës kanë thurë rrugën që do të përmirësojë jetën e qytetarëve dhe që do të çojë përpara synimet e saj drejt integrimeve evropiane”, ka thënë Jacobson, kur ka lexuar letrën ë Obamas.

“Nisja e bisedimeve me Bashkimin Evropian për marrëveshjen e stabilizim-asociimit shënon edhe një të arritur të rëndësishme të Kosovës. Për këtë dialog udhëheqësit e Kosovës kanë filluar rrugën për përmirësimin e jetës së qytetarëve, dhe kjo do të çojë përpara synimet e saj drejtë integrimeve evropiane. Në sektorin e sigurisë, NATO-ja ka deklaruar se Forca e Sigurisë së Kosovës i ka arritur kapacitetet e plota operacionale dhe ka ndërmarrë përpjekje mbresëlënëse për rekrutimin e serbëve të Kosovës”, ka shtuar më tej ajo, transmeton Koha.net.

Presidenti Obama, ka bindjen se për ndërtimi i themeleve të forta është në duart e vendit dhe për të pasur sukses duhet kontributi i të gjithëve pa marrë parasysh etnia, bindjet politike apo gjendja sociale.

Jacobson ka garantuar se Shtetet e Bashkuara të Amerikës do të vazhdojnë të përkrahin dhe të mbështesin gjithmonë shtetin e Kosovës si të pavarur, sovran, shumetnik dhe demokratik.

“E dimë që Kosova ka shumë sfida para vetës. Ne besojmë që zgjedhjet e përgjithshme duhet të mbajnë vrullin e korrektësisë së zgjedhjeve lokale të vitit të kaluar”, ka thënë në fund Jacobson. /Telegrafi/