S’ka mësimdhënës pa master!

Asnjë mësimdhënës në shkolla fillore dhe të mesme pas tri vjetësh nuk do të këtë të drejtë të japë mësim nëse nuk e ka të përfunduar masterin në fakultetet përkatëse. Ministria e Arsimit në bashkëpunim më Bashkimin Evropian, synon që brenda tre vjetësh të investojë mbi 800 mijë euro në Universitetin e Prishtinës, për përgatitjen e mësimdhënësve në kuadër të projektit TEMPUS “Modernizimi i Shkollimit të Mësimdhënësve në Universitetin e Prishtinës-Med@UP”.

Ky projekt ishte miratuar në vitin 2012, ndërsa do të fillojë të zbatohet në praktikë këtë vit. Rektori Ibrahim Gashi, ka thënë se me realizimin e këtij projekti, synohet që të ngrihet perceptimi i profesionalizimit të pozitës së mësimdhënësit në Kosovë, sipas dispozitave ligjore dhe përvojave të mira evropiane.

Ky projekt, sipas Gashit, gjithashtu synon ta ndihmojë Fakultetin e Edukimit, që të zhvillojë programe për aftësimin pedagogjik të mësimdhënësve lëndorë, në nivelin master (me kohëzgjatje 120 ECTS) dhe një program master për arsimin profesional, për mësimdhënësit e profileve të ndryshme joarsimore, që të kualifikohen për punë me nxënës. Sipas tij, të gjithë mësimdhënësit janë të detyruar të kryejnë masterin, nëse dëshirojnë të punojnë si mësimdhënës…(Tribuna).