Haziri: Do të kem kujdes të veçantë për institucionet kulturore

Gjilan – Kryetari i Gjilanit Lutfi Haziri ka pritur në zyrën e tij drejtuesit e Ansamblit i këngëve dhe valleve “Gjilani”.

Kryetari i këtij ansambli Nehat Ferati e njoftoi kryetarin Haziri për aktivitetet e shumta, problemet dhe sfidat që ata kanë pasur që nga themelimi.

“Erdhëm të konfirmojmë se do të vazhdojmë të bashkëpunojmë me institucionet. Përkundër problemeve që kemi pasur, Ansambli i këngëve dhe valleve “Gjilani” është më i suksesshmi i Anamoravës. Çdo vit e përfaqësojmë ansamblin nëpër çdo festival. Më herët ka munguar mbështetja, por te ju shpresojmë se do të na ndihmoni”, ka thënë z. Ferati.

Ndërsa, kryetari i Gjilanit Lutfi Haziri, pasi i falënderoi për vizitën, ka konfirmuar se do të ketë kujdes të veçantë për institucionet e kulturës.

“Unë gjithmonë i kam kushtuar kujdes të veçantë sferës së kulturës dhe këtë do ta bëjë vazhdimisht. Ju jeni të njoftuar se ky do të jetë një vit i rëndë buxhetor shkaku i borxheve, por do të mundohem që institucionet kulturore të mos preken nga shkurtimet”, tha kryetari Haziri./rajonipress/