Në Kakavijë kapen 19 kg drogë, shpallet në kërkim 40 vjeçari

Kakavijë – Sekuestrohen 19 kilogramë lëndë narkotike e llojit marijuanë nga policia kufitare e Kakavijës. Ngjarja ka ndodhur pasditen e djeshme rreth orës 18.00, ku policia gjatë një kontrolli të ushtruar në automjetet që lëvizin në drejtim të shtetit grek, me qëllim parandalimin dhe goditjen e trafikut ndërkombëtar të lëndëve narkotike, kanë përzgjedhur për kontroll automjetin tip Mitsubishi me karroceri me targa greke AXO 81 27, që drejtohej nga shtetasi Vasil Dervishanji, 40 vjeç, lindur në Berat dhe me banim të përkohshëm në Athinë.

Mësohet se gjatë kontrollit të mjetit, Dervishanji u largua me vrap drejt tokës greke duke iu shpëtuar kështu arrestimit nga ana e policisë.

Gjatë kontrollit të automjetit, policia arriti të gjejë të fshehur, 19 pako marihuanë me peshë totale 19 kilogram.

Ndërkohë policia shqiptare po bashkëpunon me homologët grekë për kapjen e transportuesit të lëndës narkotike Vasil Dervishanji.

Destinacioni i drogës ishte Athina. Materialet i kaluan Prokurorisë së Krimeve të Rënda Tiranë për veprime ë mëtejshme.