Krasniqi: Fond vetëm për luftëtarët që shpallen të pafajshëm

Drejtësia në Kosovë është e kapur nga politika. Fajtorë kryesorë janë Kryeministri Thaçi dhe Ministri i Drejtësisë. Arsyetimi i Thaçit për Gjykatën Speciale ishte kontroversë dhe një mashtrim për qytetarët. Kjo Gjykatë është politike dhe ne kemi qenë kundër. Fond duhet të themelohet vetëm për ata që shpallen të pafajshëm nga gjykimi për krime lufte. PDK dhe LDK kanë qenë çdo herë në shërbim të Qeverisë dhe kanë shkuar pas qerres së Kryeministrit. Isa Mustafa është alternativë e dobët e Thaçit. Kryetari i PDK’së më pati propozuar për President por në të njëjtën kohë kishte bërë lojëra me Pacollin. Kryetari i Kuvendit të Kosovës, Jakup Krasniqi, flet për Express.

Express: Pse s’votuat pro ose kundër Gjykatës Speciale, por abstenuat?
J. Krasniqi: Pse vota ime është abstenim dhe nuk është as për, as kundër, i ka arsyet e veta. Unë e njoh sistemin e drejtësisë në Kosovë dhe kam qenë që vërtet EULEX’it t’i vazhdohet mandati. Konsideroj që as Prokuroria, as gjyqësia në Kosovë, nuk ka arritur nivelin e dëshirueshëm. Gjithnjë duke shpresuar se EULEX’i ka kuadro qoftë të Prokurorisë, qoftë të gjyqësorit që kanë një nivel dhe mund ta ndihmojnë sistemin e drejtësisë në Kosovë. Kam qenë për vazhdimin e atij mandati. Por, kam qenë kundër krijimit të Gjykatës Speciale, e cila do të merret me hetimet e krimeve të luftës dhe jo krimeve të luftës që kanë ndodhur në Kosovë, por duke bërë një segregacion, duke e lënë krejt këtë dhunë që ka ushtruar regjimi i Beogradit në Kosovë edhe gjatë luftës, edhe paraluftës, edhe pasluftës dhe merret vetëm me të ashtuquajturat krime të luftës sipas pretendimeve të Dick Martyt, i cili gjithashtu është i njohur si mbështetës i regjimit të Beogradit dhe kundërshtar i të gjithë atyre forcave dhe i NATO’s që kanë ndihmuar çlirimin e Kosovës.

Express: Dikush e sheh këtë edhe si proces për largimin e ‘komandantëve’ nga skena politike. Kemi pasur edhe një deklaratë të ish-zyrtarit amerikan, James Rubin, i cili tha se krahu i luftës duhet të largohet nga pushteti?
J. Krasniqi: Prandaj, ne kemi qenë kundër kësaj për faktin se e kemi parë si Gjykatë politike dhe Gjykata duhet të merret me drejtësinë. Ne jemi për drejtësi, jemi për t’i dënuar të gjithë ata që kanë bërë krime në cilëndo anë. Në fund të fundit, krimi dhe kriminelët nuk kanë përcaktim kombëtar. Nuk janë të kësaj apo asaj etnie. Krimi është krim dhe shfaqet gjithandej nëpër botë. Por, ka tendenca edhe politike. Prandaj, ne ishim për vazhdimin e mandatit të EULEX’it. Nuk ishim për Gjykatën Speciale dhe kjo na çoi që as mos të jemi për, as të mos jemi kundër, por të abstenojmë. Edhe pse, e them me sinqeritet të plotë, ne jemi për t’i zbardhur të gjitha krimet që kanë ndodhur në Kosovë, edhe gjatë luftës, edhe pasluftës.

Express: Kujt duhet t’i faturohet themelimi i një gjykate të tillë?

J. Krasniqi: Po të shikohet në dokumentin që është ofruar nga Letra e Presidentes nuk ka ndonjë adresë të saktë. Por, nëse e kemi parasysh raportin e Dick Martyt që është miratuar në Asamblenë Parlamentare të Këshillit te Europës është e adresuar në luftë dhe te njerëzit që kanë dalë nga lufta.

Express: Si ju duket ideja e PDK’së që të themelohet një fond për ish-luftëtarët që do të gjykohen nga Gjykata Speciale?

J. Krasniqi: Unë jam për krijimin e një fondi për t’i dëmshpërblyer të gjithë ata që shpallen të pafajshëm nga Gjykata Speciale.

Unë jam për krijimin e një fondi për t’i dëmshpërblyer të gjithë ata që shpallen të pafajshëm nga Gjykata Speciale
Express: Por, jo për t’iu dhënë mjete për t’u mbrojtur gjatë procedurave gjyqësore?
J. Krasniqi: Nëse njerëzit kanë bërë krime duhet ta marrin përgjegjësinë për t’i kryer ato shpenzime vetë. Por, nëse shpallen të pafajshëm atëherë duhet të dëmshpërblehen. Edhe një çështje tjetër, unë mendoj se shteti ka për obligim që nëse të burgosurit mbahen jashtë vendit dhe familjarët shkojnë t’i vizitojnë jashtë Kosovës ato shpenzime duhet të mbulohen nga shteti përmes një fondi. Për shkak se s’kemi krijuar kushte që ata të mbahen në Kosovë por dalin jashtë Kosovës duhet shteti t’i marrë disa përgjegjësi.

Express: Kush do të jetë përgjegjës për arrestimet që do të ndodhin të njerëzve që e kanë udhëhequr luftën e UÇK’së, ndërkohë që disa prej tyre veç janë prapa grilave. Pos kësaj, PDK propozoi një fond për mbrojtjen e atyre që do të ndiqen penalisht?

J. Krasniqi: Nëse njerëzit ndiqen politikisht dhe në fund gjyqi i shpallë të pafajshëm atëherë dikush duhet ta marrë përgjegjësinë pse janë ndjekur njerëzit që s’kanë qenë fajtor. Dhe, ata njerëz duhet të dëmshpërblehen.

Express: Por, kjo s’parashihet askund. As në Statutin e Gjykatës Speciale dhe as në marrëveshjen mes Kosovës dhe BE’së?

J. Krasniqi: Në këtë rast, nëse njerëzit shpallen të pafajshëm dikush duhet t’i dëmshpërblejë ata njerëz.

Express: Megjithëkëtë, praktika ndërkombëtare por edhe Tribunali i Hagës nuk i dëmshpërblen njerëzit që i akuzon dhe i shpallë të pafajshëm?

J. Krasniqi: Tribunali i Hagës nuk i ka dëmshpërblyer të burgosurit pa faj, por praktikat ndërkombëtare është se nëse njerëzit i mban në burg pa faj i dëmshpërblen. Njerëzit që mbahen nëpër burgje të pafajshëm duhet të dëmshpërblehen dhe të tillë ka gjithë andej edhe në SHBA dhe BE.

Express: E dini se kush do të ndiqet penalisht pas themelimit të kësaj Gjykate?

J. Krasniqi: Përveç ndonjë emri që është përmendur në raportin e Dick Martyt ne emra të tjerë nuk i dimë. S’kemi pasur asnjë material mbi bazën e të cilit do ta votonim atë Gjykatë Speciale. Me një fjalë, votimi i djeshëm është votim më shumë se i verbër pa ditur se cilat janë vërtetë arsyet e vërteta, cila është e vërteta për ato hetime janë bërë. Ndoshta, po të bëhej një debat më i gjatë në këtë drejtim më kuptimplotë. Ndoshta, më mirë ka qenë për Kuvendin e Kosovës, pasi kjo trupë do të jetë europiane, pasi i ka të mangëta informacionet dhe qëllimet asaj Gjykate, më mirë ka qenë që Kuvendi i Kosovës të merrte një vendim që kjo çështje t’i lihet Parlamentit të Europës pasi ata që kishin mundësi për të pasur njohur më të plota për krijimin e asaj Gjykate.

Express: Në seancën kur u votua Gjykata Speciale ju kishit ngjitur një kravatë të kuqe dhe këmishë të zezë. Ishte rastësi kjo apo ishte diçka e qëllimshme?
J. Krasniqi: Thuhet se rasti është mbret i botës.

Express: Nuk ishte rastësi?
J. Krasniqi: Thuhet se rasti është mbret i botës. Ishte rastësi veshja ime kur u votua Gjykata Speciale.

Thuhet se rasti është mbret i botës. Ishte rastësi veshja ime kur u votua Gjykata Speciale.
Express: A është mbyllur rasti juaj në EULEX?

J. Krasniqi: Nuk kam kërkuar që të mbyllet. Ata kanë thënë që do të njoftojmë pas dy javësh. Nuk më kanë njoftuar. Vetë fillimi i procesit tregon se nga ajo s’ka pasur asgjë.

Express: Sa është i qëndrueshëm arsyetimi i Kryeministrit se nëse Gjykata nuk do të themelohej në Kuvend i njëjti proces do të kryhej në Këshillin e Sigurimit të OKB’së?
J. Krasniqi: Në rend të parë, unë nuk i besoj asaj që është thënë. Ndoshta, ajo është thënë për t’i shtyrë deputetët për të marrë vendimin që e morën. Në fund të fundit, drejtësia ndërkombëtare është drejtësi dhe nuk ia kemi frikën. Ne kemi qenë si të themi e përfaqësuar në Tribunalin e Hagës me një trup ndërkombëtare të formuar nga Këshilli i Sigurimit dhe mendoj se drejtësia në fund ka qenë në favor të Kosovës. Nuk kam pasur asnjëherë frikë nga drejtësia ndërkombëtare. Unë dhe shumëkush në Kosovë duhet të ketë frikë nga padrejtësia e jo nga drejtësia. Mendoj se diskutimi i Kryeministrit ishte shumë kontrovers dhe ishte më shumë një mashtrim për opinionin se sa një diskutim i njeriut që ka përgjegjësi për të qeverisur me vendin.

LDK dhe AAK gjithmonë në shërbim të Thaçit

Express: Si e shihni rolin e LDK’së dhe AAK’së në gjithë këtë proces?
J. Krasniqi: Jo vetëm në këtë situatë, rolin e LDK’së si parti më e madhe opozitare dhe rolin e Aleancës i shoh si aleatë kryesor të besueshëm që kanë shkuar pas qerres së Kryeministrit të Kosovë.

…Rolin e LDK’së si parti më e madhe opozitare dhe rolin e Aleancës i shoh si aleatë kryesor të besueshëm që kanë shkuar pas qerres së Kryeministrit të Kosovë
Express: Çdoherë?
J. Krasniqi: Po, çdoherë në vendimet më të rëndësishme për vendin. Sikur kur kanë votuar miratimin e Marrëveshjes së 19 prillit, sikur kur kanë votuar tani për vazhdimin e EULEX’it, e në mënyrë të veçantë për Gjykatën Speciale që do të jetë, sipas tyre, në kuadër të sistemit të drejtësisë së Kosovës. E në fakt, Gjykata do ta ketë një Statut të veçantë që s’do do të ketë lidhje as me Kushtetutën e as me Ligjet e Republikës së Kosovës.

Express: Duke i parë këto raporte mes partive opozitare dhe Qeverisë, si e shihni mundësinë e përsëritjes së koalicionit mes PDK’së dhe LDK’së në mandatin e ardhshëm?
J. Krasniqi: Për koalicione nuk dua as të mendoj sepse fundi i fundit është në dorën e subjekteve politike, në organet e tyre që i marrin vendimet për koalicionet. Ajo çka mund të them është se të gjithë e dimë se ka qenë një marrëveshje që kjo legjislaturë të ishte tri vite, por po bahen katër vite. Opozita duke qenë e paaftë për të marrë vendime të rëndësishme për vendin, realisht, jo vetëm se ia ka zgjatur jetën Qeverisë Thaçi II, por në vendime më të rëndësishme për vendin që me një mungesë të madhe të informacioneve ka qenë në shërbim të Qeverisë.

Express: Isa Mustafa ka thënë se Kuvendi do të shpërndahet këtë javë. Këtë ju e keni cilësuar si joserioze. Në fakt, kur do të shpërndahet Parlamenti?
J. Krasniqi: Se nuk ke serioze e ka pamë. S’po shpërbëhet këtë javë. E dyta, nëse partitë politike, grupet parlamentare që udhëhiqen nga liderët e tyre në mënyrë besnike dhe e pamë së fundi, ata mund ta shpërbëjnë Kuvendin dhe t’i hapin rrugë zgjedhjeve të reja nacionale. Nuk e di sa PDK, LDK, AAK së bashku me komunitetet pakicë do ta marrin një vendim të tillë. Për t’i shpërbë Kuvendi duhen 80 vota. Për të bërë kërkesën për votëbesim ndaj Qeverisë duhet 61 vota. Kjo mund të bëhet me marrëveshje për faktin se kërkohen 80 të deputetëve.

Express: Në bazë të veprimeve të Kryeministrit po shihet se zgjedhjet do të mbahen shpejt. Ai ka marrë disa vendime për rritjen e pagave, zvogëlimin e pagesës së semestrave për studentët… ?

J. Krasniqi: Mendoj se opinioni duhet të vlerësojë këto vendime. Këto vendime janë në shërbim të fushatës. Një gjë mund ta them se as Parlamenti nuk është funksional, sepse asnjë vendim i Qeverisë s’po mundet të kalojë në Kuvendin e Kosovës në mungesë të votave të koalicionit qeveritar. Mënyra se si është duke lëvizur Kryeministri nëpër Kosovë tregon që ai nuk është duke qeverisur me vendin, por është duke bërë fushatë parazgjedhore.

Express: Të flasim për “Nismën për Kosovën”. Ku është subjekti juaj politik në prag të zgjedhjeve nacionale?

J. Krasniqi: Ne jemi subjekt politik, një nismë qytetare për Kosovën. Nuk jemi parti politike. Por, mund të them se “Nisma” edhe pse është një nismë qytetare për Kosovën është e shtrirë në gjithë Kosovën. Dhe, kjo është e rëndësishmja. Edhe pse ende nuk i kemi themeluar të gjitha Këshillat e Nismës nëpër komuna, brenda një kohe të shkurtër kjo do të arrihet. Nëpër Këshillat e themeluara janë duke ndodhur zgjedhjet nëpër Këshillat e fshatrave dhe në këtë drejtim kemi një shtrirje mjaftë të mirë në Republikën e Kosovës.

Jam ndier keq që kam udhëhequr deputetët me vota të vjedhura

Express: Shumëkush shkëputjen tuaj e ka komentuar më shumë si largim jo për shkak të koncepteve, por për shkak të mospajtimeve personale?

J. Krasniqi: Jam përpjekur gjatë këtyre tri viteve ta tregoj një koncept krejt ndryshe. E them me bindje që raportet personale nuk janë prishur për interesa personale. Por, raportet janë prishur për shkak të shumë gjërave jo të mira që kanë ndodhur përgjatë këtyre viteve në Kosovë, duke filluar në mënyrë të veçantë nga zgjedhjet e fundit. Dhe, pastaj nga zgjedhja që është bërë edhe e deputetëve. Nga zgjedhjet që janë bërë për Presidenten e Kosovës. Nga përzgjedhja që është bërë e njerëzve në Qeverinë e Kosovës dhe në institucionet e pavarura. Të gjitha këto janë bërë thjeshtë në mënyrë krejt të papërgjegjshme. Në asnjë vend nuk janë vendosur njerëzit e duhur. Dhe, duke i vendosur në vendet kyçe të shtetit njerëzit jokompetentë, njerëzit e paaftë, njerëzit që nuk respektojnë ligje, nuk mund të ketë sundim të rendit e ligjit, nuk mund të ketë shtet ligjor, nuk mund të ketë politika zhvillimore dhe gjitha këto të bëjnë se nuk janë çështje personale, por janë çështje të interesit nacional. Përndryshe, unë kam qenë Sekretar i Përgjithshëm i partisë, njeriu i dytë në parti, kam qenë Kryetar i Kuvendit dhe si pozitë Kryetari i Kuvendit është njëra ndër pozitat kryesore në Republikën e Kosovës dhe se personalisht për vete s’e kam pasur asnjë arsye me i bërë gjithë këto kundërshtime që i kam bërë. Konsideroj, se niveli i demokracisë në kuadër të partisë dhe në kuadër të institucioneve të Kosovës është tepër i ultë. Nëse të gjitha këto nuk janë çështje parimore, nëse gjitha këto nuk janë çështje të interesit të përgjithshëm të Kosovës, atëherë, unë nuk di çka është personale dhe çka është e përgjithshme.

Express: Keni deklaruar se shumica e deputetëve kanë ardhur në Kuvend me vota të vjedhura. Pse i keni udhëhequr deputetët me vota të vjedhura dhe a keni menduar të jepni dorëheqje?
J. Krasniqi: E kam thënë në disa raste dhe po e them edhe tani. Realisht, nuk e kam ndierë vetën mirë, jo pse në Kuvend ka pasur njerëz që kanë ardhur jo me vota të qytetarëve, por kanë ardhur me vota të komisionerëve që i kanë blerë. Shumë njerëz që janë në Qeveri sot kanë pasur ankesa në KQZ që u janë vjedhur votat. Pastaj, ata njerëz janë sistemuar diku dhe kanë heshtur. Nuk jam ndier mirë në institucione ku nuk udhëhiqen nga ligjet dhe parimet. Por, një gjë e di. Unë në Kuvend kam hyrë me vota të mia. Bile disa më janë shmangur, sepse për t’ia dhënë votën dikujt i është marrë tjetrit. Kam menduar se a është më mirë të jem unë aty apo të vjen në vend timin dikush me vota të vjedhura. Me vota të blera të komisionerëve shumë prej të cilëve ndodhen nëpër burgje. Në këtë rrafsh, mua më dhimbsen komisionerët që kanë bërë shmangien e vullnetit të qytetarëve. Se ata nuk kanë qenë përgjegjësit kryesorë, sepse përgjegjësitë kryesorë janë ata që kanë kërkuar që vota t’i merret dikujt e t’i numërohet dikujt tjetër. Përgjegjësit e vërtetë nuk kanë dalë para drejtësisë. Por, para drejtësisë kanë dalë njerëzit më të pafajshëm.

Express: Pse s’iu bashkua askush prej njerëzve që është përmendur se mund të jenë pjesë e partisë tuaj si për shembull Hydajet Hyseni?

J. Krasniqi: Realisht, mua nuk më është e njohur. Natyrisht, por një gjë të gjithëve iu kemi thënë se unë kam marrë një vendim që ndihem mirë. Dhe, askush s’më ka shtyrë ta marrë këtë vendim. Unë s’dua të ndikoj tek asnjë deputet dhe të kërkoj që ai ta marrë një vendim që është për hatër tim. Le ta marrin vendimin për hatrin e tyre. Le ta marrin një vendim që ata ndjehen mirë. Se nuk është mirë kur njeriu merr një vendim dhe nuk ndjehet mirë. Ne më tepër dëshirojmë që këtë subjekt politik që pas zgjedhjeve do të jetë parti politike, më tepër mendojmë t’iu lëmë gjeneratave të reja, intelektualëve të rinj, ekspertëve të rinj, që gjatë këtyre viteve nuk u është dhënë mundësia t’i shpalosin vlerat e tyre, dijen e tyre që t’i vënë në shërbim të vendit dhe shtetit.

Express: Disa prej zyrtarëve të PDK’së kanë thënë se e kanë pasur vështirë të rreshtohen prapa dikujt që po përballet me akuza për korrupsion siç është z. Limaj?

J. Krasniqi: Nuk e di sa është kjo krejt e sinqertë dhe e mirë. Se “Nisma” ju e dini se ka dy organe: Këshillin Kombëtar që udhëheq unëdhe Kryesinë që e udhëheq Fatmiri. Në një mënyrë, ne kemi shkuar në këtë formë të organizimi që të dallojmë nga subjektet tjera politike. Se po bëhet koncentrimi i shumëçkaje te një lider. Koncentrimi i pushtetit te një lider s’po prodhon efekte demokratike.

Express: Sa është problematike për “Nismën” me e pas një person në krye që ballafaqohet me akuza për korrupsion?
J. Krasniqi: Shikoni, akuzat janë të para katër vjetëve dhe realisht ju e dini se akuzat do të ishin valide dhe do të duhej të përfundonin brenda 24 muajsh. Fakti se ajo aktakuzë, ato pretendime nuk kanë mundur të dëshmohen për dy vite, ato s’mund të dëshmohen as për dhjetë vite. Tjetër, se këtu konsideroj se ka ndjekje politike, e cila dëshiron të mbajë zvarrë diçka. Po të kishte fakte, gjyqi do t’i përfundonte procedura.

Drejtësia e kapur nga politika

Express: Kush është adresa politike që po e mbanë zvarrë procesin ndaj z. Limaj?
J. Krasniqi: Në këtë kohë është shumë vështirë ta thuash se cila është adresa politike. Megjithatë, po të zhvilloheshin gjykimet në kohën e duhur do të dilte edhe adresa politike. Mendoj se nuk duhet ta paragjykoj askënd, por diçka këtu nuk është në rregull. Një vepër që duhet të mbyllet brenda dy viteve nuk është mbyllur as pas katër viteve, kjo të lë të kuptohet se ka ndikime politike. Nga vijnë këto ndikime politike është vështirë ta themi. Një gjë mund ta themi se sistemi i drejtësisë është kapur nga politika.

Një vepër që duhet të mbyllet brenda dy viteve nuk është mbyllur as pas katër viteve, kjo të lë të kuptohet se ka ndikime politike. Nga vijnë këto ndikime politike është vështirë ta themi

Express: Kush e ka kapur sistemin e drejtësisë? Të flasim me emra?

J. Krasniqi: Me emra nuk e them, por përgjegjësia është e Qeverisë dhe e Ministrisë së Drejtësisë. Unë kam kërkuar në takimet e brendshme që edhe ndërkombëtarët, edhe vendorët duhet ta marrin përgjegjësinë se pse nuk e kanë krijuar një sistem të drejtësisë kredibil. Këtë e kam thënë në takimet e fundit sepse në takimet e fundit jam kyçur në këto bisedime dhe kam kërkuar që pasi ndërkombëtaret gjatë gjithë këtyre viteve kanë pasur një rol të rëndësishëm në sistemin e drejtësisë, por edhe vendorët nuk janë pafajshëm, atëherë, duhet të dihet të adresohet një përgjegjësi edhe te ndërkombëtarët edhe te vendorët se pse nuk u krijua një Prokurori kredibile, se pse nuk u krijua një gjyqësor kredibil. Të gjithë po flasin se drejtoria e burgjeve nuk është duke funksionuar. Se njerëzit janë në burg dhe s’janë në burg. Të gjitha këto kanë quar deri te kërkesa për Gjykatë Speciale. Përgjegjësia është e atyre që nuk kanë ndikuar në përmirësimin e sistemit të drejtësisë në Kosovë. Nëse dikush nuk ka ndikuar në përmirësimin e sistemit të drejtësisë në Kosovë është Qeveria si tërësi e Kryeministri dhe Ministri i Drejtësisë në veçanti. Këta dy i kanë përgjegjësitë kryesore se pse ne e kemi këtë gjendje në sistemin e drejtësisë.

Express: A keni kërkuar ndonjëherë llogari në Kuvendin e Kosovës për këta dy njerëz?
J. Krasniqi: Në Kuvend s’kam kërkuar, por në takimet që kemi pasur për Gjykatën Speciale kam kërkuar.

Express: Jemi në prag të zgjedhjeve nacionale. Janë disa emra që po përmenden për Kryeministër të ardhshëm. Kënd e shihni ju Shef të Qeverisë së ardhshme, Thaçin, Mustafën, Kurtin apo Haradinajn?
J. Krasniqi: Kryeministër kanë qejf të gjithë të bëhen, por Kryeministër do të bëhet ai që merr shumicën e votave të qytetarëve të Kosovës. Nuk kam parashikim se ndoshta unë kam dëshirë të parashikoj “Nismën”, por është vullneti i qytetarëve që do ta përcaktojë se cili do të jetë Kryeministër i Kosovës, edhe pse, nuk ka shumë zgjidhje. Qytetarët nuk kanë shumë zgjidhje dhe nuk e di sa do të mund t’ia qëllojnë zgjidhjen për Kryeministër. Por, alternativa s’ka.

Express: Është Isa Mustafa alternativë e Kryeministrit Thaçi?
J. Krasniqi: Isa Mustafa është një alternativë, ndonëse, është një alternativë e dobët.

Express: Kur e keni themeluar Nismën ka pasur pyetje se pse nuk dhatë dorëheqje nga pozita e Kryeparlamentarit. Keni thënë se nëse PDK ka kërkesë për ta marrë këtë pozitë ju do të largoheni. Ju ka ardhur ndonjë kërkesë qoftë direkte, qoftë indirekte?
J. Krasniqi: Me iu thanë të drejtën nuk ka pasur. Ndoshta më herët ka pasur në qarqe të tjera.

Express: Adem Grabovci iu pati thënë gjatë një seance se do t’ju shkarkojnë?

J. Krasniqi: Atëherë iu kam thënë vetëm bëni numrat. Dhe, tani iu kam thënë vetëm shkruajeni propozimin sepse udhëheqja e Kuvendit i takon PDK’së. Ju kam thënë bëjeni propozimin në mënyrë që mos ta marrë përgjegjësinë për krijimin e destabilitetit institucionale sepse po të mos zgjidhej Kryetari i Kuvendit Kosova mund të shkonte në zgjedhje të shpejta. Për të mos e marrë këtë përgjegjësi për krijimin e një krize institucionale kam thënë ju propozojeni kandidatin dhe unë jam i gatshëm të largohem sepse po më pengon pozita e Kryetarit të Kuvendit në punën në terren. Mirëpo, ata nuk kanë qenë të gatshëm ta bëjnë këtë kërkesë dhe nuk kanë pasur besim se mund t’i marrin 61 vota.

Thaçi më ka propozuar për President

Express:Raportet e juaja janë prishur me Kryetarin e PDK’së në momentin kur ju nuk keni arritur të bëheni President dhe e keni një hatër mbetje prej asaj kohe. Ka pasur edhe ndonjë rast tjetër pse ju sot nuk jeni në PDK?
J. Krasniqi: Edhe po të ishte kështu siç thuhet se mua më ka mbetur hatri se nuk janë bërë President, edhe pse vet Thaçi ka qenë që më ka propozuar për President.

Vet Thaçi ka qenë që më ka propozuar për President
Express: Ju ka propozuar për President?

J. Krasniqi: Po. Edhe ka qenë një delegacion i PDK’së i përcaktuar për të shkuar te Behgjet Pacollit dhe për t’i thënë që ai të heqë dorë nga kandidatura për President, por Thaçi i ka shkruar mesazh se ne po vijmë por t’i mos prano. Kur kanë shkuar të bisedojnë kanë biseduar vetëm me Fatmirin, por nuk kanë këmbëngulur as Kryeministri i ardhshëm, as Zëvendëskryeministri e Ministri i Drejtësisë, kur kanë shkuar te Behgjet Pacolli. Prandaj, ka qenë një lojë e tyre që e kanë bërë. Por, një gjë mund ta them, nuk është marre që Hashim Thaçi ka këmbëngulur që të bëhet Kryeministër i Kosovës që është në një moshë shumë më të re se unë. Pse unë mos të isha një kandidat, sepse në atë kohë ishte fjala vetëm për kandidaturë për President të Kosovë. E kisha një përvojë të gjatë politike dhe të përmbyllej edhe karriera ime si President i Republikës së Kosovës me gjithë atë bagazh politik, nuk do të ishte as në dëm të PDK’së, as në dëm të Kosovës.

Express: A gaboi z. Thaçi që nuk iu bëri juve President?

J. Krasniqi: E vërteta është se nuk ka qenë kështu. Unë kam qenë që edhe mos të bëhem unë President. Unë isha Kryetar i Kuvendit. Të bëhej President një njeri që realisht ka një përvojë politike, që ka përvojë edhe akademike dhe unë mendoj që kemi pasur njerëz të tillë sa të duash. Një njeri që ka një përgjegjësi edhe institucionale ndaj vendit të vetë. Dhe, një njeri që do ta kishte mbështetjen edhe të faktorit të brendshëm, edhe të faktorit të jashtëm. Unë mund të them se në takimet që kam pasur pak kohë më para se të bëheshin votimet, dy ndërkombëtarë, Peter Feith dhe Ambasadori i SHBA’së kanë qenë kundër zgjedhjes së Pacollit President i Kosovës.

Pak kohë para se të bëheshin votimet, dy ndërkombëtarë, Peter Feith dhe Ambasadori i SHBA’së kanë qenë kundër zgjedhjes së Pacollit President i Kosovës.

Express: Megjithëkëtë, Ambasadori Dell është parë duke i ndihmuar Pacollit të bëhej President?

J. Krasniqi: Unë po t’i citoj fjalët që të dytë i kanë thënë të njëjtat fjalë se a dëshironi ju që Behgjet Pacolli të bëhet fytyrë prezantuese e Kosovës. Pse kanë ndryshuar më vonë unë nuk e di. Por, ndryshimet janë bërë në ditët e fundit dhe dihen se si janë zhvilluar ato procese. Por, dua të them se nuk është e qëndrueshme dhe nuk kam pas kërkesë që veç unë të bëhem President. Kur është zgjedhur Presidentja i kam thënë Thaçit mos prano kandidaturë pa biseduar me Kryesinë e Partisë. Nuk e ka biseduar, prandaj, zgjedhjet kanë qenë tepër personale dhe ai e mbanë qoftë meritën, qoftë përgjegjësinë për ato zgjedhje që i ka bërë.

Express: Vlora Çitaku tha se nuk i kanë dalë lotët kur ka marrë lajmin se e keni lëshuat PDK’në. Në fakt, shumëkush ju ka parë si pengesë në PDK?

J. Krasniqi: Mendoj se shumëkush ka pritur se PDK do të ndahet më keq se LDK’ja. Por, unë jam përpjekur dhe mendoj që askush në PDK në themelimin e organizimin e saj më shumë s’ka bërë. Kur kam parë se është ngufatur demokracia e brendshme, kur kam parë që nuk ekziston një vullnet për t’i avancuar njerëzit nëpër pozita shtetërore që meritojnë të avancohen, kur kam parë që gjithçka po shkon mbrapsht kam thënë se s’dua asgjë prej jush sepse unë mendoj ndryshe dhe dua të eci rrugës time me parime e mia. Kur janë bërë zgjedhjet në parti unë s’kam dashur të bëjë asnjë debate, sepse e kam parë frymën që është përgatitur vetëm sa për sy e faqe. Janë bërë zgjedhjet sa për sy e faqe, është bërë një Kuvend sa për sy e faqe qe ata e quajtën Konventë jashtë çdo norme statutare. Kur gjithçka në PDK u koncentrua në një figurë politike nuk mbeti më vend që unë të jem pjesë e atyre veprimeve jodemokratike.

Express: A do të ndikoi “Nisma për Kosovën” që PDK të shkojë në opozitë?
J. Krasniqi: A do të ndikojë përsëri s’mund ta them unë sepse atë do ta thonë zgjedhësit dhe duhet të presim zgjedhjet për ta parë edhe fuqinë e njërës edhe fuqinë e tjetrës.