Osmani: Në zgjedhje hyra për ta ringritur LDK’në, emri im s’do të jetë pengesë për formimin e institucioneve

Vjosa Osmani, e cila garoi me Lidhjen Demokratike të Kosovës si “kandidate për Presidente” i ka falënderuar votuesit, ndërsa tha se rezultati që e mori dje partia më e vjetër në vend “nuk është fundi i një gare”, por “vazhdimi i një misioni”.

Ndërsa paralajmëroi se me LDK-në “rruga vazhdon” dhe se në zgjedhje mori pjesë për ta ringritur këtë parti, ajo tha se s’do të bëhet “pengesë në krijimin e institucioneve”.

“Të dashur qytetarë të Kosovës, të dashur mbështetës e votues të LDK-së, Nga zemra, ju faleminderit. Faleminderit për mundësinë që na dhatë, për çdo votë, për çdo fjalë inkurajuese, për çdo dorë të shtrirë dhe për çdo hap që e bëtë bashkë me ne në këtë rrugëtim. Gjatë këtyre javëve e muajve, patëm nderin të takonim mijëra qytetarë anembanë Kosovës. Dëgjuam shqetësimet tuaja, ëndrrat tuaja dhe shpresën tuaj për një vend më të zhvilluar, më të integruar dhe më të bashkuar. Kjo shpresë ishte forca jonë më e madhe. Ndihemi mirënjohës për secilin prej jush që besoi se politika mund të jetë dinjitoze, se debati mund të jetë i civilizuar dhe se e ardhmja mund të ndërtohet mbi vlera, dije dhe përgjegjësi. Faleminderit të rinjve që na dhanë energji, grave që na dhanë forcë, mërgatës që nuk e harroi atdheun dhe çdo qytetari që doli në votime duke besuar në demokraci”, shkroi ajo në fillim të një postimi në Facebok.

Rezultati që e mori LDK-ja, ajo tha se nuk është fundi i një gare. “Është vazhdimi i një misioni. Një mision për t’i shërbyer Kosovës me përkushtim, me ndershmëri dhe me respekt për secilin qytetar, pa dallim”.

“Në këto zgjedhje kam marrë pjesë me qëllim që të ndihmoj në ringritjen e LDK-së dhe për t’i dhënë vendit mundësi te riktheje balansat demokratike e të krijojë institucionet sa më parë. Në këtë drejtim, e ritheksoj atë që e kam thënë disa herë: emri im as nuk ka qenë, as nuk është e as nuk do të bëhet pengesë në krijimin e institucioneve. Përkundrazi, i gjithë kontributi im do të jetë i fokusuar vetëm në daljen nga kriza dhe ndërtimin e institucioneve të cilat mbrojnë shtetin, demokracine, kushtetutën dhe aleancat. Rruga vazhdon. Bashkë. 🤍“, shkroi Osmani.