Hasi: Unë i marr vendimet

Trajneri kosovar, Besnik Hasi, ka deklaruar se ai i merr vendimet për ekipin dhe se lojtarët nuk kanë për çfarë të ankohen, por duhet t’i respektojnë ato, shkruan sajti “Voetbalkrant” të mërkurën. Në ndeshjen e fundit kundër Zulte Waregemit që Anderlechti barazoi pa gola, Hasi e ka zëvendësuar sulmuesin serb Aleksandar Mitroviq, për çka ky i fundit nuk u nda i kënaqur.

Mitroviq pasi ka lëshuar fushën nuk ia ka zgjatur dorën Hasit. “Nuk më intereson nëse Mitroviq ka qenë i inatosur me zëvendësimin. Unë i marr vendimet. E zëvendësova për shkak se nuk isha i kënaqur me rastet e humbura”, është shprehur Hasi. “E kemi merituar të fitojmë këtë ndeshje për shkak se ishim ekip më i mirë. Si rezultat i mungesës së fatit, i humbëm dy pikë”. Anderlechti aktualisht zë vendin e tretë në tabelë me 35 pikë, dy më pak se Standardi që prin në kampionatin belg.