Bunjaku tregon kriteret për Përfaqësuesen

Selektori i Kosovës, Albert Bunjaku, përmes llogarisë së tij në rrjetin social, Facebook, i ka postuar në disa pika të shkurta, kriteret që i nevojiten një futbollisti për të qenë pjesë e Përfaqësueses.

Ai po ashtu e ka publikuar listën e Përfaqësueseve të ndryshme, me futbollistët e ftuar nga liga kombëtare përkatëse, në miqësoret e 5 marsit.

Sa u përket kritereve të seleksionimit në Përfaqësuesen A, Bunjaku e ka përmendur kualitetin e ligës ku lojtari gjendet (renditja në FIFA), konkurrencën në pozicion/shkathtësia individuale-kolektive, përvojën ndërkombëtare/edukimin, moshën dhe potencialin për të ardhmen, karakterin e lojtarit dhe gjendjen fizike.

E futbollistët që do ta kenë mundësinë ta veshin fanellën e Përfaqësueses së Kosovës, tash e tutje do t’u duhet të jenë gjithsesi pjesë e ligave seleksionuese të mëposhtme: Liga angleze 1-2-3, Liga Spanjolle 1-2, Liga Italiane 1-2, Liga Gjermane 1-2, Liga Franceze 1-2, Liga Ruse 1-2, Liga Turke 1-2, Liga Holandeze 1-2, Liga Belge 1, Liga Portugeze 1, Liga Zvicerane 1, Liga Norvegjeze 1, Liga Suedeze 1, Liga Daneze 1, Ligat 1 nga ish shtetet Jugosllave, Liga Shqipetare 1, Liga Finlandeze 1 dhe Superliga Kosovare.

Bunjaku ndër të tjera i ka përmendur edhe katër fazat e seleksionimit, duke e përmendur atë të tubimeve grupore, testimeve fizike dhe miqësores me Shqipërinë, të periudhës 2009/10, pastaj fazën e seleksionimit individual në ligën vendore dhe në Evropë (periudha 2010/14), fazën e seleksionimit individual dhe konkurrencës (periudha aktuale) dhe në fund faza e konkurrencës dhe performancës, e cila fillon në momentin e pranimit të Kosovës në UEFA dhe FIFA.