Partitë, me avazin e vjetër

Të dy blloqet politike të cilat nuk po i hapin rrugë njëra tjetrës në procesin e krijimit të institucioneve të reja, e nisën javën e re me avazin e vjetër. Pavarësisht paralajmërimeve të forta që kanë dhënë javën që e lamë pas se krizës politike po i vinte fundi, të hënën asnjëra palë nuk kanë dhënë sinjale se mund të lëvizë nga pozicionet e barrikaduara.

Para disa ditësh, kryetari i Partisë Demokratike të Kosovës, Hashim Thaçi, pas takimit që kishte me presidenten e vendit, Atifete Jahjaga, kishte thënë se kjo parti në ditët në vijim do t’i japë zgjidhje situatës së krijuar pas zgjedhjeve të 8 qershorit, nëse liderët e partive tjera nuk ulen për të biseduar së bashku dhe për të gjetur konkluzione për të dalë nga ngërçi politik. Gazeta ka provuar të marrë qëndrimin e zyrtarëve të kësaj paritë për këtë çështje, mirëpo një gjë e tillë ka qenë e pamundur.

Gjithashtu, për sqarim të situatës qe deklaruar edhe Vjosa Osmani nga Lidhja Demokratike e Kosovës. Ajo pati thënë se nuk janë tërhequr nga qëndrimet e tyre, por se janë duke i shqyrtuar hapat e tjerë se si duhet vepruar. Sipas saj, të hënën do të sqarohej gjithçka. Fundin e krizës dhe rikthimin e deputetëve në Kuvend e kanë deklaruar edhe lideri i Lëvizjes Vetëvendosje, Albin Kurti dhe Burim Ramadani nga Aleanca për Ardhmërinë e Kosovës…(Tribuna).