“25 për qind shqiptarë në rrethin e Vranjës, vetëm tre shqiptarë të punësuar në këtë qytet!”

Partia për Veprim Demokratik (PVD) mbrëmjen e sotme ka zhvilluar fushatën parazgjedhore për zgjedhjet e 16 marsit në dy vendbanime shqiptare të komunës së Preshevës, në Rahovicë dhe Miratoc.

Fushata e hapur me parullën “Është momenti” është nisur nga nënkryetari i përfaqësisë së PVD-së në Rahovicë Armend Beqiri si dhe këshilltari i këtij subjekti në Kuvendin Komunal të Preshevës Sabri Mehmeti.

Të dy këta përfaqësues të PVD-së kërkuan nga elektorati që të marrin pjesë masovikisht në këto zgjedhje për të siguruar të paktën një ulëse në Parlamentin e Serbisë, ku shqiptarët do të ngrenë zërin për padrejtësitë që po i bëhen.

Nënkryetari i PVD-së dhe njëherit kandidati për deputet Shaip Kamberi me këtë rast përveç ftesës që i bëri shqiptarëve që të marrin pjesë në këto zgjedhje të rëndësisë së veçantë, nuk e anashkaloi as rastin e fundit të caktimit të shqiptarëve për të ruajtur kutitë e votimit për interes të Çedomir Jovanoviqit e Sulejman Ugljaninit.

Ai kërkoi që votat e shqiptarëve të jepen për shqiptarët dhe jo kandidatëve tjerë që do t’i siguronin ulëse joshqiptarëve në Parlament.

Kamberi, gjatë qëndrimit në fshatin Miratoc ndër të tjera foli edhe për kufirin që nuk po hapet e që lidhë këtë vendbanim të Luginës me fshatin Llojan të banuar me shqiptar që gjendet në pjesën e Maqedonisë, raporton Titulli.