100 milionë euro për arsimtarët e paraluftës

Rreth 100 milionë euro pritet t’i kushtojë buxhetit të Kosovës Projektligji për Statusin e Punëtorëve të Arsimit Shqip në vend gjatë viteve 90-ta, i cili po përgatitet nga Ministria e Arsimit, Shkencës dhe Teknologjisë. Sipas kësaj të fundit,janë 22 mijë mësimdhënës që kanë punuar para luftës në vend, të cilëve përpos që do t’u njihet stazhi i punës, do të kompensohen edhe financiarisht.

Kompensim financiar do të marrin edhe 3200 pronarë të shtëpive-shkolla. Zyrtarë të lartë nga Ministria e Arsimit kanë bërë të ditur për gazetën “Zëri” se me këtë projektligj është menduar që të bëhet edhe kategorizimi i mësimdhënësve.

Në kategorinë e parë është paraparë të hyjnë të gjithë mësimdhënësit universitarë, sekretarët dhe kryetarët e këshillave komunale të Arsimit, kryetarët e Këshillave të Financimit, kryetari i Këshillit Qendror, drejtori i Entit Pedagogjik, drejtorët e shkollave, Rektorët, redaktorët e Institutit dhe Entit për Botimin e Teksteve.

Për këtë kategori planifikohet që kompensimi shtesë të jetë 50 për qind mbi pagën mesatare në Republikën e Kosovës. Paga mesatare në Kosovë aktualisht është 370 euro dhe me 50 për qindëshin shtesë, sipas një kalkulimi të thjeshtë, del se mësimdhënësit në këtë kategori t’i marrin nga 550 euro në muaj./zeri/