Zyrtare: Emir Sahiti kompleton transferimin tek Hamburgu

Klubi i njohur gjerman HSV Hamburg, përmes një njoftimi zyrtar ka bërë të ditur sot (e premte) se kanë arritur marrëveshje për transferimin e sulmuesit Emir Sahiti.

“Ne kemi transferuar Emir Sahitin nga Hajduk Spliti në një marrëveshje afatgjatë”, thuhej shkurtimisht në postimin e Hamburgut në Facebook.

Në ndërkohë një prononcim të shkurtër e dha edhe Sahiti pas kompletimit të transferimit të tij në Gjermani.

“Hamburgu është një ekip i madh me tifozë të mrekullueshëm. Mezi po pres që të futem në fushë dhe të dhurojë maksimumin”, ka thënë Sahiti.

Sezonin që lamë pas Sahiti ishte paraqitur në 32 ndeshje me Hajduk Splitin duke arritur që të shënojë katër gola dhe të asistojë në katër të tjerë.

Sa i përket sezonit aktual, ai numëronte katër paraqitje me fanellën e klubit kroat, por që ende nuk e kishte gjetur rrugën e rrjetës.

Në total ai kishte zhvilluar 121 ndeshje për ekipin e parë, duke arritur që të shënojë 18 gola dhe të asistojë në 16 të tjerë, teksa ka fituar dy herë Kupën e Kroacisë./Telegrafi/