Zyra sllovake mbështet zhvillimin e medieve në Kamenicë

Gjilan -Zyra ndërlidhëse Sllovake ka mbështetur Radion lokale “Premiera” me pajisje për transmetim. Gjatë një vizite në Kamenicë, shefi i këtij misioni Henrik Markus, është shprehur i kënaqur me implementimin e këtij projekti dhe mundësinë që ka zyra e tij për të mbështetur projekte të ndryshme e sidomos ato mediale.

“Mbështetja e këtij projekti promovon lirinë e medieve dhe po ashtu bashkëpunimin e mirë ndëretnik sepse është në funksion të komunitetit shqiptar dhe serb në këtë rajon. Ne e kemi përkrahur Radion “Premiera” sepse ideja e tyre ka qenë mjaft domethënëse për komunitetet këtu” ka thënë Markus.

Fatmir Matoshi, kryeredaktor i Radios Premiera, ka shprehur falënderimet e këtij mediumi për zyrën Sllovake, “Programet tona tani përveç që dëgjohen në Kamenicë, janë prezentë edhe në Ranillug dhe Novobërdë, andaj përkushtimi i ynë do të jetë edhe më i madh për punën që bëjmë në informimin e drejtë qytetarëve pa dallim etnie. “ tha Matoshi.

Kryetari i Kamenicës Shaip Surdulli e ka vlerësuar lart mbështetjen e këtij projekti nga ana e zyrës sllovake dhe po ashtu edhe punën e bërë nga Radio Premiera. “Zhvillimi i medieve e ndihmon qeverisjen e mirë në të gjitha nivelet e pushtetit, në veçanti e vlerësoj punën e madhe që bën “Radio Premiera” në informimin e qytetarëve të kësaj ane, pavarësisht faktit nëse të gjitha lajmet e tyre na pëlqejnë apo jo” ka thënë Surdulli.

Nënkryetari i Ranillugut Lulzim Canaj ka thënë se Premiera ka qenë një partner mjaft i rëndësishëm në vitet e para të krijimit të Komunës së Ranillugut.”Ne jemi mjaft të kënaqur që si komunë e re e krijuar Radio Premiera ka përcjellë të gjitha ngjarjet e rëndësishme dhe ka raportuar për to duke u bërë burim informimi për promovimin e të arriturave të komunës. Tani pas mbulimit të territorit të komunës sonë nga ana e Radios, partneriteti ynë me këtë institucion informative vetëm sa do të jetë edhe më i mirë” ka vlerësuar Canaj.

Për rolin e medieve në këtë takim kanë folur edhe Enver Mavriqi, kryesues i Kuvendit Komunal në Kamenicë, Driton Avdyli, nënkryetar i Komunës së Novobërdës si dhe Nebojsa Simic, drejtor i OJQ CDKD.

Vlera e projektit për mbështetje teknike Radios Premiera nga Zyra Sllovake arrin shumën e rreth 5000 eurove./rajonipress/