Zv.kryetari Aliu pret ansamblet e “NINULLA”, festivali ndërkombëtar mbahet në Viti

Viti – Zv.kryetari i Komunës së Vitisë, Hasan Aliu, ka pritur në takim ansamblet pjesëmarrëse në Festivalin Ndërkombëtar të Këngës Folklorike Tradicionale “NINULLA”, i cili do të mbahet më 3 dhe 4 tetor në Viti.

Ky festival, që këtë vit shënon edicionin e dytë, do të mbledhë ansamble nga Turqia, Republika Çeke, Sllovenia, Sllovakia, Qiproja Veriore, Shqipëria, Kosova dhe Maqedonia e Veriut.

Gjatë dy ditëve të festivalit, qytetarët e Vitisë do të kenë mundësi të ndjekin një program kulturor dhe artistik, ku do të prezantohen këngët, traditat dhe vlerat folklorike të vendeve pjesëmarrëse.

Sipas Komunës së Vitisë, festivali “NINULLA” synon të krijojë një hapësirë për bashkëpunim kulturor ndërkombëtar dhe të promovojë trashëgiminë tradicionale përmes muzikës dhe artit folklorik.

Gjatë vizitës në Viti, ansamblet pjesëmarrëse janë shoqëruar nga drejtori i Drejtorisë për Kulturë, Rini dhe Sport, Valmir Sahiti, si dhe drejtori i Festivalit “NINULLA”, Arsim Abazi.

Me këtë rast, përfaqësuesit e ansambleve pjesëmarrëse janë nderuar me mirënjohje nga institucionet komunale të Vitisë, në shenjë respekti dhe falënderimi për pjesëmarrjen e tyre në festival dhe kontributin në pasurimin e programit të tij.

Komuna e Vitisë ka vlerësuar se organizime të tilla krijojnë mundësi për promovimin e vlerave kulturore vendore, si dhe për krijimin e urave të reja të bashkëpunimit me vende dhe komunitete të ndryshme përmes kulturës dhe traditës./rajonipress/