Zhbogar: Së shpejti raporti lidhur me liberalizimin e vizave

Shefi i zyrës së BE-së në Kosovë, Samuel Zhbogar tha se së shpejti do të del raporti i dy misioneve vlerësuese të Komisionit Evropian, në lidhje me përmbushjen e kritereve për liberalizimin e vizave.

Sipas RTK-së, ai ka shtuar se raportet do t’i shërbejnë Qeverisë për të ndërmarrë reformat e nevojshme, deklarata këto të bëra gjatë lansimit të projektit “Fuqizimi i kapaciteteve për hetime penale kundër krimit të organizuar dhe korrupsionit”, projekt ky i Binjakëzimit në mes të Republikës së Kosovës, Gjermanisë dhe Hungarisë.

Samuel Zhbogar u shpreh se raporti i dy misioneve vlerësuese të BE-së, për udhërrëfyesin e liberalzimt të vizave do të do të përshkruaj të arriturat dhe dobësitë në pesë blloqet kryesore që lidhen me këtë çështje.

“Do të vë bazat për punën e mëtutjeshme dhe reformat që do të ndërmerren nga Qeveria e Kosovës, nga binjakëzimi, nga zyra e jonë, nga EULEX-i, vetëm për ta mbështetur Qeverinë e Kosovës në mënyrë që të udhëtohet pa regjim të vizave”.

Shtohet se ministrja e Integrimit Evropian, Vlora Çitaku ka thënë se edhe me heqjen e vizave, detyrimet dhe përgjegjësitë e institucioneve të Kosovës shtohen edhe më shumë, veçanërisht në sigurimin e kufijve dhe parandalimin e migracionit ilegal.

Ndryshe, projekti i binjakëzimit “Fuqizimi i Kapaciteteve për hetime penale kundër krimit të organizuar dhe korrupsionit”, do të zbatohet për 30 muaj nga Gjermania dhe Hungaria.

Projekti kap vlerën 1.8 milionë euro dhe synon mbështetjen e Policisë së Kosovës dhe institucioneve të zbatimit të ligjit, në parandalimin e krimit të organizuar dhe korrupsionit. /Telegrafi/