Zhbogar pret një marrëveshje më 2 prill

Përfaqësuesi Special i BE-së, Samuel Zhbogar ka thënë se pret arritjen e një marrëveshje në takimin e radhës më 2 Prill, në Bruksel.

Zhbogar ka thënë se kjo marrëveshje do të ndikonte në normalizimin e marrëdhënieve midis Prishtinës dhe Beogradit.

“Për këtë arsye edhe përfaqësuesja e lartë nuk po dëshiron të imponojë zgjidhje. Dëshirojmë që të dyja palët të përfituese dhe të kemi një zgjidhje të qëndrueshme”, ka thënë sot Zhbogar. Ai ka theksuar se nuk ka presion ndërkombëtar për të arritur deri te marrëveshja.

“Të dy kryeministrat kanë qenë shumë të çart se nuk ka ndonjë presion ndërkombëtar. Mirëpo mund të ketë presion nga shtet e tyre”, ka theksuar Zhbogar, duke shtuar se është një oportunitet ose mundësi unike që të arrihet deri te një zgjidhje e cila do të lirojë një peshë nga kraharori i të dy kombeve.

Arritja e marrëveshjes, sipas tij, do të normalizonte marrëdhëniet ndërmjet Serbisë dhe Kosovës.

“Do të normalizonte vetë situatën në Kosovë dhe kur të kemi normalizim të gjendjes mund të merren edhe më çështje të tjera të cilat i preokupojnë”, ka thënë ai, siç transmeton RTK.

Samuel Zhbogar është i bindur se më 2 prill do të ketë një marrëveshje. Të gjitha këto komente ai i bëri gjatë një vizite që i bëri Komunës së Hanit të Elezi ku u takua më kryetarin e saj Rufki Suma.