Zgjohet nga gjumi Gjykata Supreme, tregon shkeljet esenciale të Gjykatave në rastin e Luan Mustafës

Gjilan – Gjykata Supreme e Kosovës i përbërë nga kolegji prej Emine Mustafa kryetare, Valdete Daka dhe Nesrin Lushta anëtar duke vendosur për lëndën e Luan Mustafës mjek kirurg në spitalin e Gjilanit për veprën penale “marrje e ryshfeti” dhe duke vendosur sipas kërkesës për mbrojtjen të ligjshmërisë të ushtruar nga prokurori i shtetit kundër aktgjykimit të Gjykatës Themelore në Gjilan dhe kundër aktgjykimit të Gjykatës së Apelit të Kosovës, në seancën e mbajtur më 30 prill 2018, ka aprovuar kërkesën për mbrojtje të ligjshmërisë të prokurorit të shtetit duke konstatuar se me aktgjykimin e Gjykatës Themelore të Gjilanit dhe aktgjykimin e Gjykatës së Apelit të Kosovës janë shkelur dispozitat e procedurës penale në dobi të të pandehurit Luan Mustafa.

Në arsyetimin e Gjykatës Supreme të Kosovës thuhet se vendimet e dy gjykatave rreth arsyetimeve janë jokredibile sepse nuk kanë dhënë argumente se pse dëshmia e dëshmitarit është jo e besueshme. “Edhe sa i përket ligjit penal që të dy gjykatat e kanë shkel ligjin në dobi të pandehurit duke ardhur në përfundim se i njëjti nuk e ka kryer veprën penale që i vihej në barrë me aktakuzë”.

Gjykata Supreme e Kosovës duke i vlerësuar pretendimet e cekura në kërkesën e Prokurorit të Shtetit, gjen se të gjitha pretendimet janë të qëndrueshme.

Në arsyetim jepet edhe deklarata e dëshmitarit Muhamet Osmani i cili në prokurori ka deklaruar se më 4.11.2013 t`i ketë thënë kirurgut Luan Mustafa:”A janë boll me t`i dhënë unë ty 1000 euro dhe i pandehuri është përgjigjur:” se ato pare nuk janë asgjë sepse 500 euro janë për penj dhe 500 euro të tjera unë duhet me i qaros do kolegë të mijë dhe nuk po mbesin asgjë”.

Që të dy gjykatat kanë dështuar që të japin arsyetim ligjor se pse nuk i kanë besuar deklaratës së dëshmitarit Muhamet Osmani edhe pse kjo është vërtetuar edhe me deklaratën e tij se i dëmtuari në familje kishte marrë pëlqimin që t`ia jap mjekut 1500 euro deri në 2000 euro sepse kjo edhe ishte kërkesa e kirurgut dhe për ta vërtetuar këtë dyshim i pandehuri i ka thënë se “herë bëhet ky operacion këtu e herë nuk bëhet e kur të bëhet duart e mija e bëjnë” thuhet në arsyetimin e Gjykatës Supreme të Kosovës.

Ndryshe sipas aktakuzës Luan Mustafa me datën 28 tetor 2013 në Spitalin e Gjilanit,në cilësinë e personit zyrtar, në mënyrë të drejtpërdrejtë pranon dhuratë me qëllim të përfitimit për vete.

Sipas aktakuzës kirurgu Mustafa nga i dëmtuari Muhamet Osmani me qëllim të kryerjes së shërbimit, operimit të nënës së tij pranon para 500 euro në zyrën e tij në spitalin e Gjilanit, të cilat para i gjinden dhe i konfiskohen nga ana e pjesëtarëve të Policisë së Kosovës dhe i njëjti arrestohet./rajonipress/