Zgjidhja e problemit, bashkimi me Kosovën

Kryetari i Lëvizjes për Progres Demokratik në Luginë të Preshevës, Jonuz Musliu, ka kërkuar nga Qeveria e Kosovës që ta kushtëzojë integrimin e Serbisë në Bashkimin Evropian, me zgjidhjen e problemit të Luginës. E zgjidhja më e mirë, sipas tij, do të ishte trajtimi i barabartë i qytetarëve të Luginës me ata të veriut të Kosovës.

“Çdo gjë që ndodh në kundërshtim me këtë është e pabarabartë dhe e padrejtë. Mendoj se e tërë kjo është një procedurë e cila duhet të këmbëngulë Kosova që mos të pranojë kurrsesi t’u jepen të drejta serbëve të Kosovës, pa u dhënë të drejta shqiptarëve në Luginë”, ka thënë Musliu.

Në një intervistë për gazetën, Musliu ka thënë se qytetarët e Luginës së Preshevës janë populli më i diskriminuar në Evropë. Ai ka kritikuar institucionet në Kosovës se nuk po bëjnë asgjë në zgjidhjen e problemit të Luginës.

“Rezoluta e miratuar nga Kuvendi i Kosovës është vetëm në letër pasi që nuk është marrë asnjë hap konkret. Është votuar vetëm sa për zgjedhjet lokale të 3 nëntorit, për të përfituar një pjesë e subjekteve politike, përndryshe nuk ka pasur asnjë ndikim në zgjidhjen e problemit të qytetarëve të Luginës”, ka thënë Musliu.

Ai ka paralajmëruar përshkallëzim të gjendjes në rast se nuk përfillet zgjidhja e problemit të Luginës, për sa kohë që, ka thënë ai, zgjidhja e problemit të tyre, do të ishte bashkimi me Kosovën…(Tribuna).