Zgjedhjet në PDK politizojnë administratën publike

Prishtinë – Partia Demokratike e Kosovës ka politizuar edhe më administratën publike, nëpërmjet zgjedhjeve të brendshme të saj. Në struktura partiake ka futur nga drejtorë departamentesh deri në drejtorë shkollash

Muhamet Latifi është njëri nga ta. Duke qenë këshilltar politik i Arsim Bajramit sa ishte ministër, nga mesi i 2010-s ai ishte bërë drejtor në Departamentin e Administrimit të Shërbimit Civil, që funksionon në kuadër të Ministrisë së Administratës Publike. Është drejtor edhe tani, ndonëse javë më parë është zgjedhur kryetar i Degës së PDK-së në Podujevë.

Ndonëse përbën shkelje ligji, mbajtja e funksionit partiak dhe atij në administratë publike, Latifi nuk është sanksionuar nga dikush. Interesimit të Kohës Ditore për masat eventuale ndaj tij nuk i janë përgjigjur të shtunën as ministri Mahir Yagcilar dhe as sekretari i përgjithshëm, Fitim Sadiku.

Latifi nuk e ka të pezulluar postin në Ministri, sikur nuk e kanë të pezulluar as një numër i madh zyrtarësh që punojnë në sektorë jashtë shërbimit civil, sikur është arsimi, shëndetësia e të tjerë.(koha)