Zgjedhjet lokale – Asgjë befasuese!

Nga Behxhet Shala – Vetëm një komunë e madhe, Ferizaji, fitoi pa balotazh. Gjilani, për një fije floku, nuk arriti ta fitonte pa balotazh. Nëse ende nuk janë numëruar votat e diasporës, mund të ndodhë që Gjilani ta fitojë pa balotazh. Por, nëse shkon në balotazh, Alban Hyseni i LVV-së do ta ketë shumë të vështirë ta fitojë edhe një mandat.

Të gjithë fitues, askush humbës

Raundi i parë i zgjedhjeve lokale nuk solli ndonjë befasi të madhe apo ndonjë “tërmet politik”. Të gjithë e fituan kafshatën e përtypur që nga viti 2021. Deklaratat e partive politike para zgjedhjeve, përkatësisht para rezultateve preliminare, ishin kryesisht për të qetësuar votuesit dhe për të ruajtur qetësinë në korniza të pranueshme.

Vetëm një komunë e madhe, Ferizaji, fitoi pa balotazh. Gjilani, për një fije floku, nuk arriti ta fitonte pa balotazh. Nëse ende nuk janë numëruar votat e diasporës, mund të ndodhë që Gjilani ta fitojë pa balotazh. Por, nëse shkon në balotazh, Alban Hyseni i LVV-së do ta ketë shumë të vështirë ta fitojë edhe një mandat.

Pa balotazh më së shumti ka fituar Lista Serbe; nga tre komuna secila i kanë fituar LVV-ja dhe PDK-ja, dy i ka fituar LDK-ja, ndërsa nga një komunë AAK-ja, NISMA dhe partia turke në Mamushë. Dhe këtu merr fund raundi i parë. Balotazhi është ai që do të formësojë arkitekturën e pushtetit lokal, njësoj siç ndodh edhe me atë qendror.

Pse ndodh kjo?
Sepse renditja sipas fuqisë politike qendrore – që deri më tani e mban LVV-ja – nuk e nxjerr fituese pa balotazh. LVV-ja ka fituar pa balotazh në Podujevë, Shtime dhe Kamenicë. Në Podujevë dhe Kamenicë nuk pati balotazh jo sepse partia fituese ishte e fortë, por sepse PDK-ja ishte e dobët dhe luajti me lojtarë të gabuar.

LDK-ja, në Podujevë, kishte një kandidat jo bindës për kryetar, ndërsa lista për asambleistë ishte më shumë klienteliste sesa meritokratike. Kurti ia “flladiti grazhdin me vota” Bulliqit me 4 milionë euro pak para ditës së votimit.

PDK-ja, pa asnjë nevojë, eksperimentoi me Drenasin dhe Kaçanikun – të parin e humbi, të dytin e ka “në teh të shpatës”, si për ta fituar, ashtu edhe për ta humbur. Ajo shkon në balotazh në 6 komuna: me LVV-në në 4, dhe nga një me LDK-në e AAK-në.

LDK-ja ka fituar dy komuna pa balotazh dhe në 7 të tjera shkon në balotazh. Me PDK-në përballet në Dragash, me AAK-në në Junik, ndërsa me LVV-në në Pejë, Gjilan, Fushë Kosovë, Obiliq, Viti dhe Prishtinë.

AAK-ja ka fituar Deçanin pa balotazh. Me LDK-në përballet në Junik dhe Therandë, me LVV-në në Gjakovë, ndërsa në Klinë me PDK-në.

Duke qenë se LVV-ja është në garë të drejtpërdrejtë me LDK-në për Prishtinën, Pejën dhe Gjilanin, ajo nuk ka asnjë interes për marrëveshje bashkëpunimi të ndërsjellë. Po ashtu, është në garë të drejtpërdrejtë me PDK-në në Prizren, Mitrovicë dhe Kaçanik – prandaj as këtu nuk i duhet ndonjë marrëveshje.

Nga ana tjetër, Prishtina, Mitrovica e Jugut dhe Gjilani kanë peshë jetike për LVV-në – jo aq për pushtetin lokal, sa për zgjedhjet e përgjithshme. Për PDK-në dhe LDK-në, është qenësore dhe me rëndësi të veçantë ruajtja e qyteteve të mëdha: Prishtinës, Pejës dhe eventualisht Gjilanit për LDK-në, si dhe Prizrenit dhe Mitrovicës së Jugut për PDK-në.

Si mund të realizohet kjo?
Vetëm PDK-ja mund të sigurojë fitoren e LDK-së në Prishtinë, ta ndihmojë në Pejë, Viti, Obiliq dhe të mbajë gjallë shpresën për fitore në Gjilan, Fushë Kosovë dhe Therandë. Po ashtu, LDK-ja mund të jetë vendimtare për fitoren e PDK-së në Prizren, Mitrovicë të Jugut dhe Vushtrri, si dhe ta ndihmojë në Klinë e Kaçanik.

PDK-ja duhet të gjejë mënyra për t’u përafruar me Ramiz Lladrovcin para datës 9 nëntor, çka mund të ndikonte ndoshta edhe në Kaçanik (më shumë), si dhe në komunat e tjera ku ajo garon në balotazh.

Sa i përket rezultatit aspak të mirë të LVV-së në zgjedhjet lokale, aspak faj nuk kanë exit-pollet. Kërkesa e Kurtit për hetim të tyre është qesharake. Autorët e exit-pollet nuk e kanë dëmtuar LVV-në, por reputacionin e vet. LVV-në e kanë dëmtuar fjalori i shfrenuar i Kurtit, Pecit, “grekes” Mihali, antikombëtarit Murati dhe Bashës, bashkë me “Çetën e Injorantëve” të LVV-së.

Nëse do të ishte ruajtur “higjiena orale” gjatë deklarimeve publike, LVV-ja dhe Peci do ta kishin fituar Mitrovicën e Jugut pa balotazh, qartazi dhe bindshëm.

Për mua, ndonëse nuk fitoi pa balotazh, ylli i këtyre zgjedhjeve është Arian Tahiri i PDK-së. Yje janë edhe Agim Aliu dhe Ramiz Lladrovci.

Ekziston edhe një mundësi, në dukje e pabesueshme, por në moçalin tonë politik shumë e realizueshme: që PDK-ja të ndihmojë LVV-në në Prishtinë, Gjilan, Pejë, Fushë Kosovë, Viti dhe Obiliq, duke e përjashtuar LDK-në nga thuajse të gjitha komunat ku ajo garon me të. Në këmbim, PDK-ja do të fitonte Mitrovicën, Prizrenin etj., çka mund të përfundonte me një koalicion në nivel qendror, ku PDK-së do t’i takonin postet e presidentit dhe të kryetarit të Kuvendit.

A kemi mbërritur në një nivel të tillë çmendurie? Vështirë për t’u besuar – por jo e parealizueshme!

Sa i përket Qeverisë Kurti 3, edhe nëse formohet (nuk e besoj), rrëzimi i Rashiqit nga Gjykata Kushtetuese – pasi zgjedhja e tij është 100% në kundërshtim me Kushtetutën – do ta rrëzonte automatikisht edhe qeverinë Kurti 3, duke provokuar zgjedhje të parakohshme në Kosovë.

Të jemi gjallë deri atëherë!