Zënka në komunikacion përfundon me sulm fizik ndaj një zyrtari policor në Gjilan

Gjilan – Një mosmarrëveshje në komunikacion ka përfunduar me sulm fizik në rrugën “Mulla Idrizi” në Gjilan, ku viktimë ka mbetur një zyrtar policor, i cili në momentin e incidentit ishte jashtë detyrës zyrtare.

Sipas njoftimit policor, rasti është raportuar rreth orës 19:30, kur ankuesi ka deklaruar se, pas një mosmarrëveshjeje të krijuar në komunikacion, është sulmuar fizikisht nga dy persona të dyshuar.

Si pasojë e incidentit, viktima ka pësuar lëndime të lehta trupore dhe ka pranuar tretman mjekësor.

Policia ka bërë të ditur se rasti është duke u hetuar, ndërsa rrethanat e plota të incidentit pritet të sqarohen gjatë procedurave hetimore./rajonipress/