Zeneli me Helsinkin, kampion i Finlandës

Mesfushori kosovar Erfan Zeneli me skuadrën e tij HJK Helsinki ka fituar titullin e kampionit të Finlandës në futboll. Helsinki ka siguruar titullin e kampionit tri xhiro pa përfunduar stinori i rregullt, me triumfin e arritur të dielën në udhëtim ndaj TPS-s me shifrat 4:1.

Zeneli shënoi dy gola ndaj TPS-s, që të dy nga penalltia, në minutat 78-të përkatësisht 81-të. Ai luajti tërë ndeshjen. Helsinki tri xhiro pa mbaruar stinori ka 64 pikë, 11 më tepër se skuadra përcjellëse Seinaejoen JK. “Në pjesën e parë ishim mjaft të mirë.

Ne udhëhoqëm tempin dhe shënuam gol. Në pjesën e dytë TPS-ja lejoi shumë hapësira dhe ne i shfrytëzuam. Gjërat shkuan shumë mirë dhe jemi të lumtur që kemi mbrojtur titullin e kampionit”, ka thënë Zeneli, përcjellin mediumet finlandeze.
© KOHA.net