Zënë peshq në rrugët me gropa

Gjilan – Teuta Maloku, aktiviste e Vetëvendosjes, ka thënë se kanë dalë për të peshkuar në rrugët me gropa, formë kjo për të kritikuar pushtetin komunal që nuk po kujdeset për mirëmbajtjen e rrugëve.

Ajo ka thënë se qytetarët e Gjilanit paguajnë nga 40 euro taksa e tash u është shtuar edhe taksa ekologjike, por përkundër këtyre kontributeve, ata po janë të detyruar që të ballafaqohen me gropa të shpeshta.

“Kjo qeverisje e keqe në Gjilan po u kushton qytetarëve që po i nënshtrohen rreziqeve, po i kushton xhepit të qytetarëve, ngase u shpenzuan qindra mijëra euro që ishin të destinuara për mirëmbajtjen e rrugëve e ato janë si është më keq”, ka thënë Teuta Maloku, aktiviste, që ka shtuar se mjafton të bie një shi e rrugët të shndërrohen në lumenj.

Sipas saj, përroskat në rrugë ta krijuara nga korrupsioni, shpenzimet e mëdha, deformimet gjatë kryerjeve të punëve, janë thirrje për pushtetarët që sa më shpejtë të mbyllin gropat në rrugët e Gjilanit e të fshatrave, që t’i mirëmbajnë ato e të mos krijojnë pengesa tashti kur pritet ardhja e mërgimtarëve, ngase siç tha ajo nga të hyrat që inkasohen, sepse vetëm në rajonin e Gjilanit regjistrohen 15000 vetura dhe i bie që vetëm nga taksa prej 40 eurove të inkasohen 600 mijë euro, andaj Gjilani siguron mjete të mjaftueshme për të pasur rrugë cilësore pa aq shumë gropa.

“Gjilani nuk ka nevojë për gropa në të cilat mund të peshkohet, prandaj duhet thënë stop grepit të huqjes së qeverisjes komunale e Gjilanin duhet çliruar nga gropat e qytetarëve duhet mundësuar siguri për jetën e tyre”, ka thënë Teuta Maloku, aktiviste./rajonipress/