Zeka: Në Gjilan nuk do të lejohen aktet e dhunës

Gjilan – KPF u shpreh e vendosur se në Gjilan nuk do të lejohen akte të tilla, për çka janë ndërmarrë të gjitha masat parandaluese, në bashkëpunim me Policinë e Kosovës ka thënë Izmi Zeka.

Komiteti për Politikë dhe Financa në Gjilan, ka dënuar aktin e largimit të lapidarit të dëshmorëve në Preshevë, duke e cilësuar këtë një veprim qyqar të qeverisë serbe, ndërkohë që ka kërkuar nga qeveria e Kosovës që t`i marrë obligimet e veta dhe të kërkojë nga faktori ndërkombëtar respektimin e të drejtave të shqiptarëve në Preshevë, Medvegjë e Bujanoc, ashtu siç respektohen këto të drejta për pakicën serbe në Kosovë.

Njëherësh, KPF dënoi edhe aktin e dëmtimit të varrezave ortodokse në Viti e Kllokot si dhe rastin e vrasjes së një qytetari shqiptar në Ponesh, duke kërkuar nga drejtësia që ta bëjë punën e saj.

Izmi Zeka, kryesues i KPF, tha se duhet t`u lihet hapësira e duhur qeverive në Prishtinë dhe Tiranë që të ndërtojnë një qëndrim institucional dhe konsensual sa i përket gjendjes në Preshevë dhe atë ta përcjellin te mekanizmat më të fuqishëm ndërkombëtar, BE dhe SHBA, me kërkesë për mbrojtjen e të drejtave të shqiptarëve në këto komuna.

Dëmtimi i varrezave ortodokse në Viti e Kllokot, pavarësisht se nga kush është bërë, u vlerësua një akt i ultë dhe i dënueshëm për institucionet dhe shoqërinë kosovare, e cila nuk e ka në traditën e saj të prek varrezat.

KPF u shpreh i vendosur se në Gjilan nuk do të lejohen akte të tilla, për çka janë ndërmarrë të gjitha masat parandaluese, në bashkëpunim me Policinë e Kosovës. /rajonipress/