Zbogar do të qartësojë se nga kanë rrjedhur përgjimet

Përfaqësuesi i Bashkimit Evropian në Kosovë, Samuel Zbogar i ka bërë një premtim kryeministrit Hashim Thaçi se do të qartësoj se nga kanë rrjedhur bisedat e përgjuara telefonike të bëra nga EULEX-i për nevoja hetimi të një rasti korrupsioni.

“Më vjen keq që ndjenjat e shumë njerëzve janë prekur, veçanërisht ata që nuk kanë të bëjnë me hetimet. Por nuk ka pasur rrugë tjetër për EULEX-in veçse t’ua japë ato incizime mbrojtësve dhe gjykatës. I premtoj kryeministrit se do ta qartësojmë këtë situatë…. Megjithatë, përgjimet janë bërë nga EULEX, ashtu siç duhet të jetë”, ka thënë Zbogar në një intervistë për Radio Kosovën.

Ai i ka kujtuar megjithatë kryeministrit dhe zyrtarëve të tjerë se çfarë është ndërhyrje në punën e gjyqësorit pas reagimeve në rastin Limaj.

“Ndërhyrja nuk është vetëm ndonjë presion i fshehtë ndaj drejtësisë, apo kërcënimi ndaj gjykatësve ose prokurorëve. Ndërhyrje paraqesin edhe deklaratat që kundërshtojnë procedurën ligjore apo që nuk respektojnë vendimet e gjykatës apo ato që vënë në dyshim procedurat dhe vendimet e gjykatës. Kjo gjithashtu është ndërhyrje”, ka thënë Zbogar.

Shpërndaje.
© RAJONIPRESS