Zbardhen arsyet e vonesave në Parkun e Qytetit – Bllaca: Po realizohen lidhjet jetike të kanalizimit, projekti vazhdon sipas planit

Gjilan – Pas shqetësimeve dhe reagimeve të shumta të qytetarëve lidhur me dinamikën e punimeve dhe gjendjen e krijuar në Parkun e Qytetit, mbikëqyrësja e projektit, Arjeta Bllaca, ka sqaruar se punimet nuk janë ndërprerë, por janë duke u zhvilluar në një fazë teknike, e cila konsiderohet thelbësore për funksionalizimin e plotë të projektit.

Sipas saj, ekipet në terren aktualisht janë të angazhuara në realizimin e lidhjeve të kanalizimit fekal dhe atmosferik për lagjet përreth qendrës së qytetit, një proces që kërkon ndërhyrje të specializuara dhe që duhet të përfundojë përpara se të vazhdohet me fazat përfundimtare të ndërtimit dhe rregullimit të hapësirave publike.

“Punimet nuk janë ndalur. Aktualisht jemi duke realizuar kyçjen e lagjeve në rrjetin e kanalizimit fekal dhe atmosferik. Kjo është një fazë e domosdoshme teknike, e cila garanton funksionalitetin afatgjatë të infrastrukturës dhe mbarëvajtjen e projektit në tërësi”, deklaroi Bllaca për rajonipress.

Ajo theksoi se projekti po zhvillohet sipas planifikimeve të parapara dhe afati për përfundimin e tij mbetet dy vjet, ndërsa çdo fazë e realizimit monitorohet në vazhdimësi për të garantuar respektimin e standardeve teknike dhe cilësore.

Mbikëqyrja profesionale e projektit, sipas saj, realizohet nga një ekip i specializuar i përbërë nga Enver Biqku, Ajshe Spahiu, Bejtullah Krasniqi dhe Altin Syla, të cilët ndjekin nga afër çdo segment të punimeve.

Projekti i transformimit të qendrës së qytetit konsiderohet një nga investimet më të rëndësishme infrastrukturore në Gjilan, pasi synon jo vetëm modernizimin e hapësirave publike, por edhe përmirësimin e rrjeteve nëntokësore të kanalizimit, duke krijuar kushte më të mira për banorët dhe zhvillimin urban afatgjatë të qytetit./rajonipress/