Ymeri mohon marrëveshje mes Kurtit dhe Abdixhikut: Besoni vetëm qëndrimet zyrtare të LDK-së

Deputetja e zgjedhur e Lidhjes Demokratike të Kosovës, Janina Ymeri, ka mohuar raportimet për një marrëveshje të mundshme mes kryeministrit në detyrë, Albin Kurti, dhe kryetarit të LDK-së, Lumir Abdixhiku, për bashkëqeverisje.

Përmes një reagimi publik, Ymeri u bëri thirrje qytetarëve që të mos bazohen në raportimet mediatike, por të ndjekin vetëm qëndrimet zyrtare të partisë.

“Koalicionet as nuk bëhen, as nuk inicohen nga titujt mediatikë, pavarësisht se nga cila media vijnë, qoftë e afërt me pushtetin ose jo”, ka deklaruar Ymeri.

Ajo u bëri thirrje votuesve që të marrin për bazë vetëm deklaratat zyrtare të përfaqësuesve të LDK-së.

“Ftoj votuesit të konsiderojnë vetëm qëndrimin zyrtar të deputetëve të Lidhjes Demokratike të Kosovës dhe organeve të partisë”, ka shkruar Ymeri./Indeksonline/