Xhirimet e filmit për princeshën Diana nisin në Kroaci

Zagreb – Në Kroaci kanë nisur xhirimet e filmit për princeshën Diana, “Caught in Flight” nën regji të Oliver Hirschbiegelit, me Naomi Wattsin në rolin kryesor, ka njoftuar të martën Qendra Audivizuele e Kroacisë.

Kjo dramë britanike sjell rrëfimin për dy vitet e fundit të jetës së Dianës, para se ajo të vdiste tragjikisht në Paris, më 1997. Çaku i parë është bërë në Opati në ditën e fundit të qershorit, përderisa xhirimet kanë vazhduar të hënën në Zagreb. Kroacia në film “luan rolin” e katër lokacioneve.

Ajo do të jetë Franca, Australia, Britania e Madhe dhe Bosnjë- Hercegovina. Xhirimet e këtij filmi në Kroaci pritet të përfundojnë më 15 korrik. Qendra Audiovizuele e Kroacisë ka njoftuar se ajo që e ka shtyrë shtëpinë e produksionit që të xhirojnë në Kroaci, kanë qenë lokacionet e mrekullueshme por edhe lehtësimet në rastin e investimit në prodhimtarinë audiovizuele.

Kroacia këtë vit kishte marrë vendim që investitorëve të huaj t’ua kthejë investimet deri në 20 për qind. Në fokus të filmit është lidhja e fshehtë e princeshës me doktorin Hasnat Kahn. Në rolin e këtij të fundit paraqitet Naveen Andrews.