Xhemaili shkëlqen në Evropë

Fundjavë e suksesshme për futbollisten shqiptare, që vendosi ndeshjen e Comos ndaj Napolit.
Futbollistja shqiptare e Përfaqësueses së Zvicrës, Riola Xhemaili, ka qenë protagoniste për Como 1907, duke shënuar golin vendimtar në fitoren 2:1 ndaj Napolit në Serie A Women.

Xhemaili realizoi në minutën e 95-të, kur ndeshja po shkonte drejt barazimit. Pas një aksioni të Comos dhe topit të kthyer nga mbrojtja vendase, 23-vjeçarja reagoi shpejt dhe e dërgoi topin në rrjetë për rezultatin përfundimtar 2:1, transmeton albinfo.ch.

Goli ishte edhe më i veçantë për Xhemailin, pasi ishte goli i saj i parë në Serie A Women, pas transferimit te Como. Me realizimin në sekondat e fundit, reprezentuesja zvicerane i siguroi skuadrës së saj tri pikë të rëndësishme.

Fitorja bëri që Como të vazhdojë me bilanc të përsosur në kampionat, me gjashtë pikë pas dy ndeshjeve, ndërsa Xhemaili shkon në pauzën ndërkombëtare me një gol shumë të rëndësishëm për skuadrën e saj.

Xhemaili, e lindur më 5 mars 2003, është pjesë e Përfaqësueses së Zvicrës dhe këtë edicion po zhvillon sezonin e saj të parë me Como në elitën e futbollit italian.