Xhaka mund të shkojë në Olimpiadë “me zor”

Moenchengladbach – Për Granit Xhakën fillimi i karrierës në Gjermani mund të jetë më i vështirë se mesfushori kosovar ka parashikuar.

Skuadra e re e Xhakës, Borussia Mounchengladbach, më 2 korrik i nis përgatitjet për edicionin 2012/2013. Xhaka ka planifikuar që në fazën përgatitore të dëshmojë vlerat dhe të stabilizohet në mjedis të ri.

Por, ai ka gjasa që të mungojë një kohë të gjatë në përgatitjet e Mounchengladbachut. Mesfushori 19-vjeçar mund të ftohet në përfaqësuesen olimpike të Zvicrës për t’u paraqitur në Olimpiadën “Londra 2012”. Vetë Xhaka ka deklaruar se nuk është i interesuar të luajë në Olimpiadë, por Federata zvicerane mendon se ai është i domosdoshëm.

FIFA më herët ka obliguar të gjitha klubet që të lirojnë futbollistët për turneun olimpik. Kjo mund të bëjë që dëshira e Xhakës të mos merret për bazë.

Përzgjedhësi i shpresave të Zvicrës, Pierluigi Tami, më 6 korrik do të bëjë të ditur emrat e lojtarëve në të cilët llogarit për Lojërat e 30-ta olimpike. Xhaka është pjesë e ekipit të zgjeruar.

“Më me dëshirë do të qëndroja në Mouchengladbach me qëllim që të kualifikohemi në Ligën e Kampionëve. Për këtë edhe kam ardhur këtu”, ka thënë Xhaka, shkruan të enjten “Kicker.de”. “Të takoj trajnerin e skuadrën është më e rëndësishme se Olimpiada”.

Shpërndaje.
© RAJONIPRESS