Split – Mesfushori i Përfaqësueses së Zvicrës, Granit Xhaka, është 19- vjeçar, por ai në fushë jep përshtypje se është dukshëm më i vjetër. Ai tregon pjekuri të madhe. Xhaka tregon se vazhdimisht merr pyetje për pjekurinë e tij. “Nuk dukem vetëm në fushë më i pjekur, por edhe në jetën normale. Edhe veten e pyes pse është kështu”, ka thënë Xhaka, në një intervistë të publikuar të mërkurën nga gazeta zvicerane “NZZ”.
Përgjigjen për këtë ai e kërkon te një lëndim i rëndë që kishte marrë si 16-vjeçar.
“Unë si 16- vjeçar kam pasur një lëndim të rëndë të ligamenteve. Kam dashur të dorëzohem dhe të lë futbollin. Ishte një moment i rëndësishëm, që më ndryshoi jetën. Pas lëndimit u riktheva në fushë, por nuk po funksiononte asgjë. Isha i zhgënjyer nga vetja dhe nisa të dyshoja në veten. Unë po pyesja veten se çfarë kam. Ishte koha kur po kryeja shkollimin për asistent të byrosë dhe isha vazhdimisht në kontakt me njerëzit më të vjetër dhe më të pjekur se unë. Tek ata jam orientuar. Por, kisha edhe një shef që më bindi të drejtohem në futboll. Koha e mësimit më ndihmoi që të piqem mentalisht”, tregon Xhaka.
Ai kishte lënë shkollimin vetëm gjysmë viti pa përfunduar.
“Kam dashur me çdo kusht që të kem futbollin dhe një profesion. Por, nuk po ecte. Mirëpo, prapë kam mësuar shumë, që pas karrierës të punoj në byro nëse është e nevojshme”, tregon Xhaka.
