Xhaferi: Qosja është i parehatshëm

Në një intervistë për gazetën ‘Shqip’, Arbën Xhaferi flet për gjuhën standarde shqipe. Përveçqë del në mbrojtje të gjuhës standarde, ai nënvizon se është “paksa i shokuar nga mendjelehtësia sektare me të cilën trajtohet ky problem”.

Veç kësaj, Xhaferi zë në gojë edhe karakterin e akademikut, Rexhep Qosja. Këtë të fundit e vlerëson si “të parehatshëm”.

Derisa po fliste për 100-vjetorin e Pavarësisë, respektivisht, për mosftimin nga Akademia e Shkencave të akademikut Rexhep Qosja në këtë ngjarje, Xhaferi thotë:

“Profesor Qosja gjithsesi se nuk është i rehatshëm. Ai është një polemist i lindur, dhe nuk i duron situatat ku ai duhet të luajë rolin që dikush tjetër ia cakton.

Ndjenja e tij për dinjitet dhe integritet është shumë e zhvilluar, kështu që, ai nuk përton të polemizojë me ata që, sipas tij, kanë qëndrime të gabueshme. Mendoj se kriteret që manifestojnë cilësinë e kulturës së tij, dhe postulatet e tij morale, i krijojnë më shumë probleme atij sesa shoqërisë shqiptare.

Duke marrë parasysh kontributin e tij ndaj kulturës dhe kauzës shqiptare, mendoj se Qosja duhet të tolerohet, të pranohet ashtu si është, dhe jo si e parapëlqejnë të tjerët”.