West Ham hyn fuqishëm në garë për Xhakën, gati 15 milionë euro

Klubi anglez, West Ham United raportohet se është skuadra më e fundit që i është bashkuar garës së zjarrtë për transferimin e mesfushorit shqiptar, Granit Xhaka.

Sipas medieve britanike, “Çekanët” janë të vendosur për të siguruar shërbimet e 32-vjeçarit dhe tashmë kanë përgatitur një ofertë konkrete që i përgjigjet kërkesës së Bayer Leverkusenit.

Klubi londinez është i gatshëm të ofrojë 15 milionë euro, një shumë që përputhet me vlerësimin që Leverkuseni i ka bërë kartonit të Xhakës, i cili ka kontratë me klubin gjerman deri në vitin 2028.

Ditëve të fundit, interesimi për kapitenin e Zvicrës është shtuar ndjeshëm. Në garë për të janë përmendur emra të njohur si Sunderland, Inter, Fenerbahçe, Crystal Palace, Nottingham Forest, Fulham, si dhe dy gjigantë italianë, Juventus dhe Milan.

Ndërkohë, skuadra saudite Neom SC, e cila para pak ditësh ishte një nga ofertuesit seriozë, është tërhequr nga bisedimet për shkak të kërkesave financiare të Leverkusenit.

Xhaka mbetet një nga emrat më të nxehtë të këtij afati kalimtar, dhe vendimi për të ardhmen e tij pritet të merret në ditët në vijim.