VV në Kamenicë e quan pushtetin çoroditës

Kamenicë – LVV-ja, si opozitë konstruktive në Kuvendin e Komunës së Dardanës krejt këto shkelje do t’i adresojë në MAPL dhe në Gjykatë, për t’i ndalur hovin paligjshmërisë së filluar në Komunën e Dardanës me këtë pushtet të ri çoroditës.VV-ja do të punojë dhe angazhohet gjithmonë në interes të qytetarëve dhe për forcimin e institucioneve të komunës dhe zbatimin e ligjshmërisë së plotë në Komunën e Dardanës thuhet në njoftimin e VV.

Lëvizja Vetëvendosje, Qendra në Dardanë me shqetësim po i ndjek zhvillimet në institucionet komunale, konkretisht punimet në mbledhjen e parë të Kuvendit të Komunës së Dardanës për këtë legjislaturë dhe për vitin 2014.

Në një komunikatë të kësaj qendre thuhet se më 10.01.2014, Kuvendi i Komunës në Dardanë mbajti mbledhjen e parë për vitin 2014, ku me këtë rast pati shumë shkelje ligjore dhe shkelje statutare siç ishin ndryshimi i statutit të Komunës së Dardanës pa debat me qytetarë dhe shoqërinë civile.

Për interesa të ngushta të këtij koalicioni PDK-AKR-AAK-GIZK(serbët), dëshira për të formuar sa më shumë drejtori në mënyrë për t’i përmbushur qëllimet e pushtetarëve dhe apetitet e këtij koalicioni joparimorë!

Ky koalicion në vend që të reduktojë shpenzimet në administratë dhe personel vetëm po i rritë ato dhe kështu po thellon humbjet në buxhet. Kjo gjë është kundërligjore, sepse një komunë me rreth 35.000 banorë sa i ka Komuna e Dardanës dhe me territor të tkurrur nga procesi i dëmshëm dhe i padrejtë i decentralizimit me 58 vendbanime, nuk duhet të ketë më shumë se 5+1 drejtori, e jo sa ka tani 11, një më pak sesa komuna më e madhe në shtet, Komuna e Prishtinës.

Dhënia e dy pozicioneve drejtuese minoritetit serb është në kundërshtim me ligjin për vetëqeverisjen lokale të Republikës së Kosovës dhe statutin e Komunës së Dardanës, njërin në legjislativ: zëvendëskryesuesin e Kuvendit të Komunës si dhe tjetrin në ekzekutiv: nënkryetarin e dytë të Komunës së Dardanës.

Këto dy pozita pakicës serbe më nuk iu takojnë, ngase në bazë të regjistrimit të popullsisë në vitin 2011, numri i popullsisë së kësaj pakice nuk arrin as në 5% nga ku rrjedhimisht dhe ligjërisht më nuk iu takojnë këto pozicione, por, koalicioni PDK-AAK-AKR, i bëri këto shkelje për shkak të përmbushjes së apetiteve të listës serbe GIZK, ngase dy mandatet që i ka kjo listë i duhen këtij koalicioni dhe kryetarit Sinani për të bërë votat e sigurta në kuvend për pazaret e dëmshme në dëm të interesave të qytetarëve.

Ne, Lëvizja Vetëvendosje! e përfaqësuar në Kuvendin e Komunës me një mandat këshilltari i kundërshtuam këto veprime, bashkë me grupin kuvendor të LDK-së, por, koalicioni qeverisës me 17 vota na mbivotoi dhe e bëri të veten.

I pakënaqur me zhvillimin e mbledhjes dhe me sjelljen e kryesuesit të kuvendit, anëtari ynë në Kuvendin e Komunës, Arsim Thaçi në shenjë proteste e lëshoi mbledhjen.

Edhe gjatë zgjedhjes së kryesuesit të Kuvendit të Komunës së Dardanës pati disa procedura të parregullta zgjedhore, ku në fletëvotimin e hartuar për kandidatin për kryesues, kishte paqartësi për mënyrën e votimit, pra, kishte vetëm një rubrikë (katrorë) dhe nuk theksohej se si të votohej, mungonin rubrikat (katrorët) për votimin kundër dhe për ambstenim.

Për të përmbushur apetitet e aleatëve të tij, kryetari Sinani bëri shkelje të dispozitave ligjore në fuqi kur emëroi zëvendëskryetarin dhe nënkryetarin nga anëtarët e koalicionit të tij(AAK-AKR), në kundërshtim të plotë me ligjin për vetëqeverisjen lokale dhe statutin e Komunës së Dardanës.

Vërejtje tjetër shumë serioze ishte që nuk ka xhirime të plota dhe të rregullta për zhvillimin e seancës të Kuvendit të Komunës, si dhe pasqyrimi i atyre xhirimeve e lajmeve dhe njoftimeve në mënyrë të njëanshme në vebfaqen e komunës, ku mungon thelbi i zhvillimit të mbledhjes, diskutimet dhe propozimet e opozitës nuk figurojnë fare!

Qytetarët e Komunës së Dardanës dhe opinionin e gjerë askush nuk guxon t’a privojë nga e drejta e tyre për t’u informuar në mënyrë të drejtpërdrejtë nga punimet dhe zhvillimet e mbledhjeve të Kuvendit të Komunës së Dardanës.

LVV-ja, si opozitë konstruktive në Kuvendin e Komunës së Dardanës krejt këto shkelje do t’i adresojë në MAPL dhe në Gjykatë, për t’i ndalur hovin paligjshmërisë së filluar në Komunën e Dardanës me këtë pushtet të ri çoroditës.

LVV-ja do të punojë dhe angazhohet gjithmonë në interes të qytetarëve dhe për forcimin e institucioneve të komunës dhe zbatimin e ligjshmërisë së plotë në Komunën e Dardanës thuhet në njoftimin e VV./rajonipress/