VV, e vetme kundër Rexhepit

Lëvizja Vetëvendosje, e udhëhequr nga Albin Kurti, ende nuk e ka gjetur mbështetjen e partive tjera opozitare për ta ftuar në interpelancë ministrin e Punëve të Brendshme, Bajram Rexhepin.

Deputeti i Lëvizjes Vetëvendosje, Rexhep Selimi, nuk ka mundur të thotë nëse e kanë mbështetjen e opozitës që t’i kërkojnë kryeministrit të Kosovës, Hashim Thaçi, shkarkimin e ministrit të Punëve të Brendshme, Bajram Rexhepi, mirëpo sipas tij, kjo do të duhej të ndodhte pas debatit në seancën e Kuvendit të Kosovës.

Nsërkaq, sekretari i përgjithshëm i LDK-së njëherësh anëtar i kryesisë së Kuvendit të Kosovës, Ismet Beqiri, nuk është në dijeni për një kërkesë të tillë nga ana e Vetëvendosjes.

“Unë nuk kam informata për një kërkesë të tillë”, ka thënë shkurt Beqiri.
Nga ana tjetër, deputeti i AAK-së, Ahmeti Isufi, ka thënë se do ta shohin rrjedhën e debatit në seancë dhe në bazë të vlerësimeve të shumicës së Kuvendit do të vendosin për veprimet e mëtutjeshme.

Ndonëse, sipas tij, është AAK-ja që edhe më herët ka kërkuar dorëheqjen e këtij ministri. “Kjo është pasojë e krejt keqqeverisjes në vend, e cila nuk varet vetëm prej një ministri, por prej kryeministrit dhe qeverisë”, ka thënë Isufi.(zeri)