Vllasi: Të gjitha partitë politike e kanë të vështirë të hyjnë në koalicion me Vetëvendosjen

Partitë në pushtet dhe koalicioni i tri partive opozitare kundër qeverisjes aktuale ende nuk kanë gjetur një zgjidhje për të dal nga bllokada shtatë mujore.
Tre subjektet e opozitës janë bashkuar kundër një pike të përbashkët e cila është kundërshtimi i marrëveshjeve për krijimin e komunave me shumicë serbe dhe kërkesa për dorëheqjen e qeverisë, raporton Indeksonline.

Por për të shkuar në zgjedhje të parakohshme, në bazë të deklaratave të fundit nga anëtarët e partive opozitare, një koalicion i tillë duket se është i pamundur të funksionojë.

Në lidhje me këtë,njohësi dhe analisti i çështjeve politike, Azem Vllasi e sheh të pamundur këtë koalicion parazgjedhor pasi që sipas tij këto parti nuk kanë asgjë të përbashkët.

“Kjo opozitë edhe ashtu nuk ka pika të përbashkëta programore e politike, prandaj një koalicion i qëndrueshëm parazgjedhor por edhe paszgjedhor me këto subjekte duket i pa mundshëm. Mund të ndodhë një koalicion i tillë vetëm nëse koalicioni i tanishëm që është në pushtet PDK-LDK shkojnë prapë bashkë në koalicion parazgjedhor për ta marr pushtetin prapë, atëherë opozita do të bashkohej jo se kanë synime të përbashkëta programore por thjeshtë për interes të pushtetit” , ka thënë Vllasi për Indeksonline.

I pyetur lidhur me deklaratat e sekretarit të Lëvizjes Vetëvendosje, Dardan Molliqaj për një koalicion të kësaj partie me LDK-në, Vllasi tha se kjo është absolutisht e pabesueshme por prej LDK-së gjithçka pritet.
“Kjo është absolutisht e pabesueshme por kur t’i kemi parasysh zgjedhjet e kaluara kur LDK betohej se nuk do të hyj në koalicion me PDK-në kjo na jep konkludim se për LDK-në çdo gjë është e mundur për tu sjell vërdallë në pushtet dhe mos me shku në opozitë. Por në anën tjetër gjitha këto parti zor e kanë të shkojnë në një koalicion parimor në bazë programeve dhe synimeve politike me Vetëvendosjen sepse VV është një subjekt politik me orientime politike ideologjike dhe synime që pak kanë të përbashkëta me partitë tjera qofshin këto të pozitës ose opozitës” , tha Vllasi./Indeksonline/