Vllasi: Serbia ka frikë nga problemet në Kosovë

Serbisë nuk mund t’i përsëritet rasti “Gjingjiq”, ndërsa ekstremistët nga Kisha Ortodokse Serbe do të mposhten. Marrëveshja mes Serbisë dhe Kosovës do të zbatohet, e Kosova nuk është e ndarë, edhe pse kjo kështu de facto duket sot, thotë Azem Vllasi në një intervistë për agjencinë Anadolija.

Këshilltari i Kryeministrit të Kosovës për politikë të jashtme, deklaron se Beogradi ka frikë nga problemet në Kosovës, sepse Serbia një kohë të gjatë “me telekomandë ka mbajtur dhe nxitur shpresat e rreme të serbëve nga veriu i Kosovës, që kjo pjesë e territorit të jetë e pjesë e Serbisë”.

“Autoritetet e Beogradit po përballen me pasojat e politikave të tyre të gabuara. Forcat që janë të gatshme për të shkaktuar tronditje dhe destabilizim të Serbisë për këtë marrëveshje, nuk janë më të forta. Ato do të jenë përherë e më të dobëta. Është e rëndësishme që në mesin e serbëve të Kosovës, dhe madje edhe në pjesën veriore, shumica mbështetin marrëveshjen e Brukselit. Kundërshtarët e fundit nga veriu rezistojnë nga interesi personal, sepse për 14 vite e kanë shfrytëzuar mirë situatën për të mbushur xhepat personal në zonën gri si dhe me kontrabandën dhe kriminalitetin e të gjitha llojeve”, thotë ai.

Duke komentuar shkrimin e The New York Times se Kosova në Bruksel është ndarë, Vllasi këtë e mohon. Ndërsa, duke folur për protestat e dhunshme në Serbi për shkak të marrëveshjes Prishtinë-Beograd, të cilave u janë bashkuar krerët e Kishës Ortodokse Serbe, Vllasi thotë se ata nuk mund t’i hakmerren udhëheqësisë aktuale të Serbisë.

“Kjo tregon se në KOS ka strukturë konservatore dhe destruktive. Sidomos për çështjen e Kosovës. Ata përpiqen ta mbajnë Serbinë në të kaluarën, në kohën e Milosevicit. Por, kjo është shumë indikative dhe shumë pozitive për vetë Serbinë, sepse ka ndarje në KOS. Ajo nuk është më unike. Patriarku Irenei publikisht ka shprehur mospajtimin e tij me ekstremistët që i mishëron, për shembull, Amfilohije. Qytetarët serbë dhe njerëzit në pushtet nuk janë aq afër KOS-it, si në kohën e Milosevicit”, tha Vllasi i cili shton se Serbisë nuk guxon t’i ndodh sërish rasti “Gjingjiq”, duke aluduar në vrasjen e ish-kryeministrit serb i cili ka afirmuar ndryshimet në Serbi. /Telegrafi/