Vllasi: Partitë, të kenë qëndrime të qarta për vendet e rezervuara

Analisti Azem Vllasi, theksoi për Telegrafin se debatet e kohëve të fundit për shtimin e vendeve të rezervuara në Kuvendin e Kosovës kanë krijuar konfuzion në mesin e qytetarëve të Kosovës.

Sipas tij, kjo paqartësi është si pasojë e qëndrimeve të kundërta të partive shqiptare të cilat janë pjesë e ekzekutivit kosovar.

“Parlamenti është vendi ku duhet të diskutohet kjo çështje. Në njërën anë e kemi qëndrimin e pakicave të cilat unanimisht janë për shtimin e vendeve të rezervuara, ndërsa partitë shqiptare janë të paqarta në këtë drejtim, sepse dallojnë në qëndrime. Mendoj se ende nuk është thënë sinqerisht se çka parasheh Pakoja e Ahtisaarit në njërën anë dhe Kushtetuta e Kosovës në anën tjetër për këtë çështje. Mendoj se, ajo çka më së paku na duhet në këtë kohë është përplasje në mes komuniteteve rreth vendeve të rezervuara në Kuvendin e Kosovës”, ka thënë Vllasi.

Ministri i Punës dhe Mirëqenies Sociale, Nenad Rasic, në një prononcim për media ka paralajmëruar se minoritetet mund të largohen nga të gjitha institucionet shtetërore nëse nuk u vazhdohen ulëset e rezervuara në Kuvend edhe për një mandat. /Telegrafi/