Vjosa Osmani: Kush i mohon simbolet, mohon Republikën e Kosovës

Shkelja e kushtetutshmërisë dhe ligjeve të Republikës së Kosovës duhet të trajtohet njëjtë, pavarësisht a bëhet ajo nga komuna e Gracanicës, nga komunat në veri të vendit, apo nga Komuna e Prishtinës. Kështu ka reaguar deputetja e LDK-së Vjosa Osmani, e cila kryeson Grupin parlamentar për Integirme në Parlamentin e Kosovës.

“Neni 2.2 i Ligjit për simbole specifikon se “me flamurit, stemën dhe himnin përfaqësohet Republika e Kosovës dhe identiteti i saj shtetëror” dhe neni 4.1 thotë se “Flamuri shtetëror vendoset në ambientet e brendshme dhe të jashtme të institucioneve shtetërore…” , shkruan ajo në Facebook.

Përdorimi i simboleve shtetërore rregullohet edhe përmes Neni 15 të Ligjit per Protokollin e Shtetit. Komunat, qartë, janë institucione shtetërore, dhe zyra e një kryetari të komunës është zyra kryesore përfaqësuese e atij institucioni.

Edhe pse komunat kanë të drejtë të kenë simbolet e tyre dalluese, ligji i obligon që ato t’i përdorin krahas simboleve shtetërore. Edhe Kushtetuta parasheh se flamuri, stema dhe himni janë simbolet shtetërore të Republikës së Kosovës.

Pra kushdo që i mohon këto simbole, e mohon Republikën e Kosovës.

“Është mirë të dihet që Kryetari Isa Mustafa GJITHMONË ka mbajtur edhe flamurin kombëtar në zyrë, krahas atij shtetëror. Kështu që kushdo që thotë se e solli flamurin kombëtar tani, nuk e thotë të vërtetën. Me qindra fotografi të botuara nga zyra e kryetarit Mustafa gjatë mandatit të tij e vërtetëtojnë këtë”, ka shkruar Osmani.

Heqja e simboleve shtetërore, prandaj, është shembull shumë i keq i qeverisjes dhe akt i turpshëm, dhe tregon injorim ndaj shtetit. Ministria e Administrimit të Pushtetit Lokal do të duhej të reagonte ndaj të gjitha rasteve të tilla, pavarësisht a udhëhiqen komunat nga shqiparët apo nga serbët, ka shkura Osmani./Publiku/Indeksonline/