Moti sot dhe ditëve tjera

Sot në Kosovë pritet të mbajë mot me vranësira e nganjëherë me intervale kohore me diell. Do të fryjnë erëra mesatare e në disa lokacione paksa të fuqishme nga jugu dhe juglindja, ndërsa nuk do të mungojnë reshjet e herëpashershme të shiut të karakterit lokal. Temperaturat pritet të luhaten nga 3 minimalja deri në 17 gradë Celsius.

Në Shqipëri sot pritet mot mjaft i ndryshueshëm, me vranësira, rrebeshe lokale shiu, por edhe me intervale të herëpashershme të shkurtra kohore me diell. Pasdite vonë në jug të vendit parashihen rrebeshe lokalisht paksa më intensive shiu me vetëtima dhe bubullimë, pastaj rrebeshet lokale të shiut “ripërtërihen” në gati tërë vendin.

Reshje të lokalizuara shiu sot priten edhe në Maqedoninë Veriore, Luginë të Preshevës dhe Mal të Zi, por reshjet nuk do të zgjasin shumë.

Fillimi i javës së re do të karakterizohet me shira dhe rrebeshe të shpeshta në Shqipëri dhe Mal të Zi, ndërsa në viset tjera reshjet ende do të jenë më të pakta dhe më të rralla, megjithatë reshjet e shiut përhapen apo shpeshtohen në tërë rajonin nga mesi i javës./MeteoBallkan