Vjosa Osmani fiton terren në Gjilan, qytetarët shprehin zhgënjim ndaj Albin Kurtit dhe shqetësim për largimin e Përparim Ramës nga LDK

Gjilan – Mbështetja qytetare për Vjosa Osmanin në Gjilan duket se është në rritje, teksa ajo po konsiderohet nga shumë qytetarë si një figurë që mund të ndikojë në rikthimin dhe fuqizimin e LDK-së në skenën politike. Sipas perceptimeve në terren, Osmani po fiton përkrahje në lagje dhe zona të ndryshme të qytetit, duke u parë si një faktor potencial në garën e ardhshme zgjedhore.

Qytetarë të intervistuar në Gjilan shprehin qëndrime të ndryshme, por një pjesë e tyre e lidhin mbështetjen për Osmanin me zhgënjimin ndaj zhvillimeve të fundit politike, si brenda LDK-së, ashtu edhe në nivel qendror. Ata theksojnë se përçarjet dhe, siç i cilësojnë, “qëndrimet mendjemëdha” të një pjese të strukturave në qendër kanë dëmtuar imazhin dhe unitetin e partisë.

Në të njëjtën kohë, largimi i figurave si Përparim Rama shihet nga disa si një zhvillim që mund të ketë pasoja për LDK-në, duke dobësuar më tej strukturat e saj në një moment të ndjeshëm politik.

Në anën tjetër, një pjesë e qytetarëve shprehin hapur pakënaqësi ndaj kryeministrit Albin Kurti. Një qytetar nga Gjilani, Remziu, deklaron se këtë herë nuk do ta mbështesë më: “E kam votuar për shkak të Vjosa Osmanit, por kësaj radhe nuk do ta votoj më Kurtin”, u shpreh ai.

Ndërkohë, një tjetër qytetar, Mejdia, vlerëson se rezultati zgjedhor mund të ndikohet nga qëndrimi i mbështetësve të Osmanit.
“Kësaj radhe, votat nuk do të shkojnë automatikisht. Vjosa Osmani do të ketë përkrahje në Gjilan, edhe pse ka pasur edhe gabimet e saj, por mbetet një figurë intelektuale”, tha ai.

Analistët vlerësojnë se zhvillimet e fundit tregojnë një ripozicionim të elektoratit dhe një rritje të ndjeshmërisë ndaj figurave individuale brenda partive politike.

Në këtë kontekst, ndikimi i Vjosa Osmani në zonën e Gjilanit mund të jetë një faktor me peshë në konfigurimin e rezultateve të ardhshme zgjedhore, sidomos për Lidhja Demokratike e Kosovës, e cila synon rikthimin e besimit të elektoratit./rajonipress/