Vjen “Vjeshta letrare” në Gjilan

/ 2 minuta lexim

Gjilan – Organizatori ka paraparë që manifestimi të nis me 5 tetor, me përurimin e veprës së autores Linditë Ramushi, për të vazhduar deri më 21 dhjetor 2012, me krijuesit tjerë nga Kosova, Shqipëria, Kosova Lindore e Mërgata.

Ars Clubi letrar “Beqir Musliu” i Gjilanit, një asociacion ky alternativ i shkrimtarëve në Kosovë, që në këto tri vite të ekzistimit të tij, ka bërë një punë të madhe edhe në veprimtarinë botuese, është bërë gati për të filluar manifestimin e sivjetmë “Vjeshta letrare e Gjilanit”, që këtu mbahet për herë të tretë radhazi.

“Vjeshta…” ka për qëllim afirmimin e vlerave të reja letrare të krijuesve nga trevat shqiptare, thotë Sabit Rrustemi, kryetar i Ars Clubit “Beqir Musliu”. Sipas tij, “Vjeshta 2012” është e veçantë, sepse mbahet në shenjë të 100-vjetorit të Pavarësisë së Shqipërisë.

Eco Higjiena

Organizatori ka paraparë që manifestimi të nis me 5 tetor, me përurimin e veprës së autores Linditë Ramushi “Me sytë e ëndjes”, për të vazhduar deri më 21 dhjetor 2012, kur edhe përmbyllet “Vjeshta…” e këtij viti.

Më 6 tetor do të prezantohen poetët nga Tirana, Izet Duraku, Aqif Hysa e Rexhep Shahu. Më 19 tetor, përurohet libri poetik “Mëkatar mos eja” i Arsim Halilit, krijues nga Kosova Lindore. Më 3 nëntor prezantohet portreti letrar i Sabile Keçmezit – Bashës, për të vazhduar më 17 nëntor, me poezinë e poetit Xhevat Latifi, më 23 nëntor 2012, me veprimtarinë letrare të Ibrahim Ibishit dhe për të arritur më 8 dhjetor, ku prezantohen krijuesit nga mërgata.

Aktivitetet do të mbahen në Gjilan, Kamenicë e Prishtinë. Ars Clubi “Beqir Musliu” pret bashkëpunim e koordinim me krijuesit, asociacionet tjera letrare si dhe me institucionet komunale të Gjilanit dhe donatorët eventual, në mënyrë që manifestimi të ketë mbarëvajtjen e tij ashtu siç është planifikuar./rajonipress/