Vjen paralajmërimi i rëndë për Kosovën në prag të zgjedhjeve

Krimi dhe korrupsioni, do të vazhdojnë të mbesin njollë e zezë për Kosovën. Analistët japin paralajmërimin tronditës për drejtësinë kosovare…

Tashmë dihet publikisht që drejtësia kosovare vazhdon të jetë një njollë e zezë për Kosovën, ku në shumë raporte ndërkombëtare ajo është cilësuar e kapur nga krimi dhe të ‘fortit’ e politikës në Kosovë të cilët kontrollojnë gjithçka në vend.

E sipas analistëve politikë, një gjë e tillë do të vazhdojë edhe në të ardhmen, pasi edhe qeveria dhe legjislatura e re në Kosovë, nuk do ta ketë guximin ta nis procesin e Vettingut.

Sipas analistëve, në Kosovë mungon vullneti politik për një gjë të tillë dhe është pak e pritshme që qeveria e re do ta ketë fuqinë ta pastroje drejtësinë kosovare, por do të vazhdojë ende që politizimi dhe kriminalizmi i drejtësisë të jetë një njollë e zezë për Kosovën.

“Nuk ka vullnet politik për realizimin e Vettingut, as në Tiranë Vettingu nuk u realizua nga vullneti politik i vendorëve por nga vendimi-detyrimi i mekanizmave ndërkombëtar. E njëjta mund të ndodhë në Kosovë, vetëm me presione dhe kushtëzime ndërkombëtare. Pa pastrimin e pushtetit të tretë nuk ka lëvizje përpara”, thotë për “Kosova Sot Online”, analisti dhe njohësi i fushës së drejtësisë, Hasan Preteni.

Sipas tij, prokurorët dhe gjyqtarët kosovarë vazhdojnë të jenë njerëz të kapur nga pushteti.

“Deputetët e ministrat edhe po ndërrohen nganjëherë, por këta prokurorë e gjyqtarë asnjëherë,të njëjtit që 20 vite vetëm po e gllabëritin buxhetin, me shumë vende pune,me shumë privilegje jetësore dhe kaq. Asnjë rast të veçantë, asnjë konfiskim me vlerë, asnjë zyrtar i lartë në burg. Ata që e kalojnë Vettingun duhet së pari t’i dënojnë tani kolegët e vet. Në të gjitha shtetet demokratike, ku sundon rendi dhe ligji, punën e parë që e kanë bërë i kanë burgosur prokurorët, gjyqtarët dhe avokatët, kanë dhënë shembull. Lufta-revolucioni në drejtësi ka filluar nga ata dhe me ata. Të mirët dhe profesionistët i kanë burgosur e i kanë zhveshur nga sistemi, ata që këtë sistem e kanë sjellë në këtë ditë”, tha Preteni për “Kosova Sot Online”.