Vjehrri dhe vjehrra “deportojnë” nusen në Shqipëri

Shqiptari 28 vjeçar me shtetësi austriake me ndihmën e prindërve “riatdheson” dhunshëm ish gruan e tij në Shqipëri

Një rast i pazakonshëm rrëmbimi mes shqiptarësh po bën bujë në shtypin e sotëm austriak. Një grua e re 22 vjeçare nga Shqipëria, prej 5 vitesh kishte qëndruar në Austri, e martuar me një bashkatdhetar të saj me shtetësi austriake. Ky i fundit kishte ushtruar në vazhdimësi dhunë ndaj saj dhe e kishte kërcënuar.

Pasi ishin shkurorëzuar vitin e kaluar, bashkëshorti i saj 28 vjeçar kishte vendosur ta kthente gruan në Shqipëri, ashtu që të mos bartte pasojat financiare nga shkurorëzimi në Austri. Për të kryer këtë aksion, atij i duhej të bënte disa makinacione dhe, të angazhonte prindërit e tij, të cilët po kështu jetojnë në Austri.

Me tu kthyer nusja nga puna, ish bashkëshorti, me të cilin ende bashkëjetonte, ia merr telefonin dhe shlyen të gjithë numrat. Nga ana tjetër, vjehrra tashmë po ia bënte gati valixhet…

Së shpejti 22 vjeçarja e sheh veten në aeroportin e Vjenës, prej nga me aeroplan fluturon për në Shqipëri, ku “i dorëzohet” familjarëve të saj, pasi i janë marrë të gjitha dokumentet austriake. Në një gjendje të tillë ajo e sheh veten të pafuqishme për tëndërmarrë çkadooqoftë.

Mirëpo, nga ana tjetër, në këtë rrëfim inkuadrohet shefja e zyrës ku shqiptarja kishte punuar në Austri. Të nesërmen pas “zhdukjes” së shqiptares, pasi që mosardhja e saj në punë pa paralajmërim i kishte bërë përshtypje, asaj i vjen një letër nga ish bashkëshorti i punëtores, ku nusja gjoja jepte dorëheqje nga puna. Pasi që e sheh me dyshim këtë punë, shefja lajmëron autoritetet. Këto të fundit vejnë kontakt me përfaqësinë austriake në Tiranë, e cila angazhon zyrtarin e saj policor në këtë rast.

Së shpejti, 22 vjeçares i mundësohet kthimi në Austri me dokumente të reja. Këtu ajo fillimisht vendoset në një shtëpi për strehimin e grave deri sa i gjendet një banesë. Ndërkohë ndaj ish bashkëshortit të saj dhe vjehrrive gjatë vjeshtës do të zhvillohet një proces gjyqësor për veprat penale heqje e paligjshme e lirisë, lëndime të rënda trupore dhe kërcënim të rrezikshëm.(albinfo.ch)