Vitia zgjerojnë ndriçimin publik, funksionalizohet ndriçimi në disa zona të qytetit dhe fshatrave

Viti – Komuna e Vitisë po vazhdon investimet dhe ndërhyrjet në funksionalizimin e rrjetit të ndriçimit publik në qytet dhe në zonat rurale. Sipas njoftimit të drejtorit për Shërbime Publike dhe Emergjenca, Arton Musliu, ndriçimi publik tashmë është funksional në disa prej rrugëve dhe lagjeve të komunës.

Në qytetin e Vitisë është funksionalizuar ndriçimi në sheshin “Micheline Calmy-Rey”, ndërsa ndërhyrje janë bërë edhe në rrugën kryesore në hyrje të qytetit, nga “Muhamet Muharremi” deri te rruga “Tirana”, si dhe në aksin kryesor në dalje të Vitisë në drejtim të fshatit Drobesh.

Punimet për ndriçimin publik kanë përfshirë gjithashtu lagjen Hajdini-Sylejmani në Sadovinë të Jerlive dhe lagjen Zuka në Pozhoran, ku ndriçimi tashmë është funksional.

Drejtoria për Shërbime Publike dhe Emergjenca ka bërë të ditur se procesi i rregullimit dhe funksionalizimit të ndriçimit publik do të vijojë edhe në zona të tjera të komunës, me qëllim përmirësimin e sigurisë dhe kushteve të lëvizjes për qytetarët gjatë orëve të mbrëmjes.

Drejtori Arton Musliu ka kërkuar mirëkuptimin e qytetarëve për shkak të numrit të madh të kërkesave, duke theksuar se të gjitha kërkesat do të adresohen në vazhdimësi./rajonipress/