Viti – Kryetari i Komunës së Vitisë, Sokol Haliti ka nënshkruar sot një marrëveshje për bashkëfinancim me Ministrinë e Administrimit të Pushtetit Lokal (MAPL) dhe Helvetas Swiss Intercooperation, projekti DEMOS me të cilët parashihet të bëhet renovimi i çerdhes së fëmijëve “Gëzimi Ynë” në Viti, si dhe do të bëhet ndërtimi i një ure dhe atë në lokacionin mes qytetit të Vitisë dhe fshatrave Binqë dhe Kabash.
Nënshkrimi i kësaj marrëveshje është bërë në kuadër të garantit të performances e cila ka për qëllim stimulimin e komunave për përmirësimin e mëtutjeshëm të performances së tyre në fushat e qeverisjes demokratike.
Haliti ndër tjerash tha se realizimi i këtyre dy projekteve është në interes të qytetarëve të kësaj komune, duke potencuar se me renovimin e çerdhes në Viti, fëmijët do të kenë një ambient edhe më të mirë për edukim.
Ai ka falënderuar në veçanti Projektin DEMOS për ndihmën e vazhdueshme që po e jep në projekte të fushave të ndryshme duke theksuar se Komuna e Vitisë do të zbatoj në përpikëri obligimet që dalin nga marrëveshja e nënshkruar./rajonipress/
