Vitia e prekur nga tragjedia e familjes Alidema

Viti – Vdekja tragjike e katër qytetarëve nga Pozherani i Vitisë ka prekur rëndë tërë këtë rajon, derisa ngushëllime kanë shprehur Sokol Haliti, Naim Pira, dhe dega e PDK-së.

Sokol Haliti ka ngushëlluar familjarët e 4 të vdekurve në aksidentin e ndodhur në Prishtinë. Me rastin e vdekjes së katër qytetarëve të komunës së Vitisë të cilët humbën jetën në një aksident trafiku në Prishtinë, kryetari i komunës së Vitisë Sokol Haliti ka shprehur ngushëllime familjes Alidema nga Pozherani për humbjen e më të dashurve të tyre.

Edhe kryesuesi i Kuvendit Komunal të Vitisë ngushëllon familjen Alidema për humbjen e katër familjarëve. “Lajmi për vdekjen e 4 qytetarëve të komunës së Vitisë, na ka prekur të gjithëve. Me pikëllim të thellë, shprehim ngushëllimet tona më të përzemërta për familjen Alidema dhe gjithë të afërmit, shokët dhe miqtë e kësaj familje”, thuhet në telegramin e ngushëllimit të kryesuesit të Kuvendit Komunal të Vitisë Naim Pira.

Kurse, Dega e PDK-së në Viti shprehë ngushëllimet e përzemërta për rastin tragjik të familjes Alidema nga Pozherani. “Lajmi tragjik për humbjen e jetës së më të dashurve tuaj na ka pikëlluar të gjithëve, po ashtu urojmë shërimin sa më të shpejt të të mbijetuarit nga kjo tragjedi. Pranoni ngushëllimet tona duke u lutur që të jetë rasti i fundit tragjik për qytetarët tanë” thuhet në telegramin e degës së PDK-së në Viti./rajonipress/