Vitia dhe Kllokoti thellojnë bashkëpunimin në shërbime publike dhe administratë

Viti – Drejtori i Shërbimeve Publike në Komunën e Vitisë, Arton Musliu, ka pritur në një takim pune drejtoreshën për Shërbime Publike dhe Administratë Publike në Komunën e Kllokotit, Arjeta Rexhepi.

Gjatë takimit, palët diskutuan për bashkëpunimin ndërkomunal dhe shërbimet që Komuna e Vitisë ofron edhe për qytetarët e Kllokotit, veçanërisht në fushën e zjarrfikjes dhe çështjeve infrastrukturore.

Musliu theksoi se drejtoria që ai udhëheq mbetet e përkushtuar të ofrojë mbështetje profesionale dhe ekspertizë, duke kontribuar në rritjen e efikasitetit të administratës publike dhe përmirësimin e shërbimeve për qytetarët.

Nga të dyja palët u vlerësua rëndësia e thellimit të bashkëpunimit institucional, me qëllim të avancimit të shërbimeve publike dhe zhvillimit të qëndrueshëm në nivel lokal./rajonipress/