Viti: Vendosen tabela që njoftojnë për vëzhgimin me kamera në rrugët e qytetit

Viti – Drejtori i Drejtorisë për Shërbime Publike dhe Emergjencë në Komunën e Vitisë, Arton Musliu, ka bërë të ditur se në koordinim me Policinë e Kosovës dhe Agjencinë për Informim dhe Privatësi janë vendosur tabela informuese që tregojnë vëzhgimin me kamera në disa nga rrugët e qytetit.

Sipas tij, kjo nismë është ndërmarrë nga Komuna e Vitisë, përkatësisht nga Drejtoria për Shërbime Publike dhe Emergjencë, me qëllim të rritjes së transparencës dhe ndërgjegjësimit të qytetarëve për praninë e sistemit të mbikëqyrjes me kamera në hapësirat publike.

Musliu theksoi se vendosja e këtyre tabelave synon të kontribuojë në parandalimin e dukurive kriminale, rritjen e sigurisë për qytetarët, si dhe në mbrojtjen e pronës publike dhe private.

Ai shtoi se bashkëpunimi institucional me Policinë e Kosovës dhe Agjencinë për Informim dhe Privatësi është i rëndësishëm për zbatimin korrekt të standardeve ligjore në fushën e sigurisë dhe privatësisë./rajonipress/